फरवार्ड कम्युनिटीको सेयर बाँडफाँडमा भएको त्रुटीबारे छानबिन सुरु

फरवार्ड कम्युनिटी माइक्रोफाइनान्सले निष्कासन गरेको साधारण शेयर बाँडफाँटमा अनियमितता भएको भन्दै नेपाल धितोपत्र बोर्डमा उजुरी परेको छ । एउटै आवेदन नम्बरबाट धेरै फाराम सङ्कलन गरी बाँडफाँट प्रक्रियामा अनियमितता गरिएको भन्दै साना लगानीकर्ताहरूले उजुरीमार्फत बोर्डसमक्ष आग्रह गरेपछि बोर्डले अनुसन्धान थालेको छ । यस विषयमा बोर्डले आईपीओ निष्काशन तथा विक्री प्रबन्धक नविल इन्भेष्टमेन्ट बैंकिङसँग कुराकानी गरेको बताइएको छ । 

फरवार्ड कम्युनिटीको सेयरमा १७०५७ नम्बरको आवेदनबाट लक्ष्मी भट्टराई, १७०५८ नम्बरको आवेदनबाट सञ्जय भण्डारी र १७०५९ नम्बरको आवेदनबाट यशोदा न्यौपानेले सेयर आवेदन गरेका थिए । नबिल इन्भेष्टमेण्ट बैङ्किङले आफ्नो वेबसाइटमा पहिलो पटक राखेको शेयर बाँडफाँटको नतिजा हेर्दा १७०५७ नम्बरको आवेदनबाट राजन श्रेष्ठ, १७०५८ नम्बरको आवेदनबाट गौरीशङ्कर श्रेष्ठ र १७०५९ नम्बरको आवेदनबाट रूपक धन्वन्तरीलाई सेयर परेको देखिएको थियो ।