हरेक साताको अन्तिम दिन शुक्रबार बैंकिङ खबर डट कमले साताभरिका बैंकिङ समाचारहरुलाई एउटै पानामा समेट्दै आइरहेको छ । यस साता पनि बैंक तथा वित्तीय क्षेत्रसँग सम्बन्धित विभिन्न गतिविधिहरु भए । बैंक तथा वित्तीय संस्थासम्बन्धी विभिन्न समाचार तथा गतिविधिहरुलाई सञ्चार माध्यमहरुले महत्वका साथ प्रकाशन तथा प्रशारण गरे । बैंकहरुमा तरलता कम हुँदा विभिन्न क्षेत्रमा देखिएका प्रभावहरु यो साता हरेक सञ्चार माध्यममा मूख्य समाचार बन्यो । समग्रमा, साताको सुरुवातदेखि बैँक तथा वित्तीय क्षेत्रमा भएका प्रमुख गतिविधिहरु यहाँ प्रस्तुत गरिन्छ :
गाडी र घरजग्गामा बैंकहरुले लगानी रोक्ने
नेपाल राष्ट्र बैंकको चेतावनीपछि वाणिज्य बैंकहरुले गाडी तथा घरजग्गामा भईरहेको लगानी तत्कालका लागि रोक्ने निर्णय गरे । अनुत्पादक क्षेत्रमा लगानी बढाएको भन्दै नियामक निकायले असन्तुष्टि जनाएपछि बैंकहरुले सेयर धितो कर्जा पनि रोक्ने निर्णय गरेका हुन् । वाणिज्य बैंकहरुको छाता संगठन नेपाल बैंकर्स एशोसियसनको आज बसेको बैठकले तत्काललाई गाडी, घरजग्गा, सेयर धितो ऋण रोक्ने निर्णय गरेको संघका अध्यक्ष अनिल केशरी शाहले जानकारी दिए ।
सनराइज बैंकले किन्यो एनआईडीसी क्यापिटल
सनराइज बैंक लिमिटेडले एनआइडीसी क्यापिटल मार्केट्स लिमिटेडलाई खरिद गरेर शुक्रबारदेखि एकीकृत कारोबार सुरु गर्यो । माघ १३ गते एक्विजिसनका लागि नेपाल राष्ट्र बैंकबाट अन्तिम स्वीकृति पाएको बैंकले सनराइज बैंक लिमिटेडको नामबाट एकीकृत कारोबार सुरु गरेको हो । सनराइजसँग एनआइडीसी क्यापिटलको स्वाप रेसियो ६५ प्रतिशत कायम गरिएको छ ।
सुन आयातको कोटा बढ्यो
नेपाल राष्ट्र बैंकले सुन आयात तथा विक्रीवितरण कार्यविधि २०६८ संशोधन गरी सुन आयातको कोटा बढायो । वाणिज्य बैंकहरुको नाममा परिपत्र जारी गर्दै जारी गरिएको संशोधित कार्यविधिअनुसार केन्द्रीय बैंकले हाललाई सुनको दैनिक आयात कोटालाई बढाएर २० किलो कायम गरेको हो । यसअघि वाणिज्य बैंकहरूले दैनिक १५ किलो सुन आयात गर्दै आएका थिए ।
बैंकिङ कसुरका दोषी पक्राउ
बैकिङ कसुरमा दोषी ठहर भई फरार भएका काठमाडौं मन्डिखाटारका किरणकेशर नेपाललाई प्रहरीको केन्द्रीय अनुसन्धान व्यूरो (सिआईबी)ले पक्राउ गर्यो । उनलाई काठमाडौँको पानीपोखरीबाट सोमबार पक्राउ गरिएको सीआईबीले जनाएको छ । २०६७ असारमा उनले कम्पनीबाट धितोमा हुँदै नभएको सिता खाँडसरी चिनी मिल परियोजनाका लागि नौ करोड रुपियाँ ऋण लिई उक्त रकम जग्गाको कारोबारमा लगानी गरेर दुरुपयोग गरेका थिए । एकचालिस बर्षीय नेपाललाई पुनरावेदन अदालत पाटनले २०७१ साल बैशाखमा तीन बर्ष कैद र नौ करोड ४१ लाख ३७ हजार जरिवानाको फैसला सुनाएको थियो ।
भिबोर सोसाइटी र लुम्बिनी फाइनान्स मर्जरमा जाने
केही महिना अघि भिबोर विकास बैंक र सोसाइटी डेभलपमेन्ट बैंक मर्जर भई देशकै ठूलो विकास बैंक बनेको भिवोर सोसाइटी डेभलपमेन्ट बैंकले आफ्नो नामै मेटिने गरी दोश्रो संस्थासँग मर्जर सम्झौता गर्यो । लुम्बिनी फाइनान्स एण्ड लिजिङ लिमीटेडसँग मर्जर भई ‘लुम्बिनी विकास बैंक लिमिटेड’ रहने सम्झौता गरेको हो । दुबै संस्था मर्ज भई बन्ने लुम्बिनी विकास बैंकको चुक्ता पुँजी दुई अर्ब ३८ करोड रुपैयाँ पुग्नेछ ।
खोरुंगा जलविद्युत्मा तीन बैंकले लगानी गर्ने
तेह्रथुम पावर कम्पनीले निर्माण गर्न लागेको ७.५ मेगावाट क्षमताको माथिल्लो खोरुङ्गा खोला जलविद्युत् आयोजनामा माछापुच्छ्रे बैंक लिमिटेडको नेतृत्वमा नेपाल बङ्गलादेश बैंक र जनता बैंकले लगानी गर्नेसम्बन्धी द्विपक्षीय सम्झौता भयो । कुल एक अर्ब ३७ करोड रुपैयाँ लागत अनुमान गरिएको आयोजनामा ३७ करोड रुपैयाँ प्रवद्र्धक संस्थाले र बाँकी रकम माछापुच्छे बैंक लिमिटेडले ४० करोड रुपैयाँ, नेपाल बङ्गलादेश बैंकले ३० करोड रुपैयाँ र जनता बैंकले ३० करोड रुपैयाँ लगानी गर्ने भएका छन् ।
अन्य,
सिद्धार्थ बैंकले प्रदान गर्दै आएको विभिन्न कार्ड सेवाहरु डेबिट, क्रेडिट र प्रिपेड कार्डहरुलाई स्तरोन्नति गरी इएमभि चिप कार्डका रुपमा सञ्चालनमा ल्यायो ।
रुरल माइक्रोफाइनान्स डेभलपमेन्ट सेन्टर लिमिटेड र नेपाल बैंक लिमिटेड बीच बैंकिङ कारोबारसम्बन्धी सम्झौता सम्पन्न भयो ।
नेपाल एसबिआई बैंकले अनलाइन आस्वा सेवा सुरु गर्यो ।
