तरलता अभावमा नाममा व्याजदर बढाउँदा उद्योगधन्दामा असर परेको भन्दै नेपाल उद्योग परिसंघ (सिएनआइ) ले सोको विरोध गरेको छ । बुधबार एक प्रेस विज्ञप्ति जारी गर्दै परिसंघले बैंकहरुले उद्योग धन्दा नै बन्द हुने गरि ऋणको ब्याज वढाएर सम्झौताविपरीत काम गरेको जनाएको छ । ‘पहिले नै सम्झौता भइसकेका उद्योगलाई समेत ब्याज बढेको पत्र पठाउने क्रम सुरु भएको छ,’ परिसंघद्धारा जारी विज्ञप्तिमा भनिएको छ, ‘बैंकहरुले छोटो अवधिको निक्षेपमा पनि १२ प्रतिशत ब्याज दिइरहेका छन् । बढि ब्याज दिइएको निक्षेपको हिस्सा कम भएकाले लागत कम छ । तैपनि बैंकहरुले समग्र ऋणको ब्याज भने बढाइरहेका छन् ।’
राष्ट्र बैंकले तोकेको कर्जा र निक्षेपको ब्याज अन्तर (स्प्रेड दर) को सीमासमेत नाघ्ने गरि बैकहरुले कर्जाको ब्याज दर बृद्धि गरेको परिसंघको तर्क छ । विज्ञप्तिमार्फत परिसंघले तरलता अभाव र ब्याज दर बृद्धिको समस्या हल गर्न सरकार, राष्ट्र बैंक र सरोकारवालासँग आग्रहसमेत गरेको छ ।
