लिखु–२ जलविद्युत् आयोजनामा माछापुच्छ्रे बैंकको अगुवाईमा विभिन्न छवटा वित्तीय संस्थाले रु चार अर्ब ५१ करोड लगानी गर्ने भएका छन् । आयोजनामा माछापुच्छ्रे बैंकलगायत मेगा बैंक, नेपाल एसबिआई बैंक, नेपाल बङ्गलादेश बैंक, एभरेष्ट बैंक र भिवोर सोसाइटी डेभलपमेण्ट बैंकले संयुक्तरुपमा लगानी गर्ने सम्झौता भएको हो ।
लगानीसम्बन्धी सम्झौतामा प्रवद्र्धक कम्पनी र बैंकबीच केही दिन पहिले सम्झौता भएको प्रवद्र्धकले जारी गरेको विज्ञप्तिमा जनाइएको छ । लगानीकर्ता बैंक तथा वित्तीय संस्थाहरूको तर्फबाट माछापुच्छ्रे बैकका प्रमुख कार्यकारी अधिकृत निरजकुमार श्रेष्ठ र प्रवद्र्धक ग्लोबल हाईड्रोपावर एसोसिएटका तर्फबाट अध्यक्ष मोतीलाल दुगडले हस्ताक्षर गर्नुभएको थियो । आयोजनाको कुल लागत रु छ अर्व दुई करोड लाग्ने अनुमान गरिएको छ जसमध्ये ७५ प्रतिशत बैंक तथा वित्तीय संस्थाको र २५ प्रतिशत प्रवद्र्धकको लगानी रहनेछ ।
ग्लोबल हाइड्रोपावर एसोसिएटले अगाडि बढाएको सो आयोजनाको क्षमता ३३ मेगावाट रहेको छ । रामेछाप जिल्लाको गुम्देर र सोलुखुम्बु जिल्लाको भकाञ्जेमा आयोजना स्थल रहेको आयोजनाबाट वार्षिक १८ करोड २५ लाख ९० हजार युनिट विद्युत उत्पादन हुनेछ । उक्त आयोजना विसं २०७७ साल भित्र सम्पन्न गर्ने लक्ष्य राखिएको जनाइएको छ । रासस
