सेयरमा लगानी गर्ने सोचमा हुनुहुन्छ भने तयार रहनुस् । अर्को साता तीन लाख ६४ हजार आठ सय कित्ता आईपिओ खुल्दैछ । आगामी साताको मंगलबार समता माइक्रोफाइनान्सको र बुधबार छ्याङ्दी हाइड्रोपावरको सेयर खुल्न लागेको हो ।
समता माइक्रोफाइनान्स वित्तीय संस्था लिमिटेड
समता माइक्रोफाइनान्स वित्तीय संस्था लिमिटेडले ९४ हजार ८०० कित्ता साधारण सेयर (आईपिओ) पुस १९ गतेदेखि विक्री गर्ने भएको छ । संस्थाले १०० रुपैयाँ अंकित मूल्यमा ९४ लाख ८० हजार रुपैयाँ बराबरको सेयर सर्वसाधारणका लागि विक्री गर्न लागेको हो । जसमध्ये, एक हजार आठ सय ९६ कित्ता सेयर कर्मचारी र चार हजार ७४० कित्ता म्युचुअल फण्डहरुलाई आरक्षित गरिएको जनाइएको छ । बाँकी सेयरका लागि सर्वसाधारणले आवेदन दिन सक्नेछन् ।
उक्त आईपिओमा छिटोमा पुस २२ र ढिलोमा माघ ४ गतेसम्म आवेदन दिन पाइनेछ । न्युनतम ५० देखि अधिकतम ५०० कित्तासम्म आवेदन दिन सकिने बताइएको छ । समताको सेयर सिनष्काशन तथा विक्री प्रबन्धकमा एनआइबिएल क्यापिटल रहेको छ । एनआइबिएल क्यापिटलको कार्यालय लाजिम्पाट, नेपाल इन्भेष्टमेन्ट बैंकका शाखाहरु, बारास्थित माइक्रोफाइनान्सको कार्यालय लगायत बिभिन्न ११ संस्थामा सेयर आवेदन बुझाउन सकिने बताइएको छ ।
बाराको सिमरामा प्रधान कार्यालय रहेको माइक्रोफाइनान्सको चुक्ता पूँजी हाल दुई करोड २१ लाख २० हजार रुपैयाँ रहेको छ । आईपिओ बाँडफाँड गरेपछि संस्थाको पुँजी तीन करोड १६ लाख रुपैयाँ पुग्नेछ ।
छ्याङ्दी हाइड्रोपावर लिमिटेड
छ्याङ्दी हाइड्रोपावर लिमिटेडको दुई लाख ७० हजार कित्ता साधारण सेयर (आईपिओ) पुस २० गतेदेखि निष्काशन हुने भएको छ । छ्याङ्दीले आयोजना प्रभावितका लागि एक सय रुपैयाँ अंकित दरमा दुई करोड ७० लाख रुपैयाँ बराबरको सेयर निष्काशन गर्न लागेको हो । दुई मेगावाटको आयोजनाले स्थानीयलाई १० प्रतिशत सेयर वितरण गर्न लागेको हो ।
कम्पनीको सेयरको निष्काशन तथा बिक्री प्रबन्धकमा ग्लोबल आईएमई क्यापिटल लिमिटेड रहेको छ । माघ ५ गतेसम्म निष्काशन खुला रहने उक्त सेयरमा लमजुङ जिल्लावासीले आवेदन दिन पाउनेछन् । सेयरमा कम्तिमा ५० कित्ता र वढिमा एक हजार कित्तासम्मका लागि आवेदन दिन सकिने बताइएको छ । छ्याङ्दी हाइड्रो पावर लिमिटेड फलेनी गाविस वडा न १ ग्लोबल आईएमई बैंक लिमिटेड शाखा कार्यालय बेशीशहर, प्यासीफिक डेभलपमेन्ट बैंक लिमिटेड भोटेबडार लमजुङ, कैलाश विकास बैंक लिमिटेड शाखा कार्यालय बेसीसहरमा आवेदन दिन सकिनेछ ।
कुल दुई लाख ७० हजार कित्ता सेयरमध्ये छ्याङ्दीले अति प्रभावित फलेनी र बन्सर गाविसका वासिन्दालाई ४० प्रतिशत, चिती, ढोडेनी, नौथर र वेसीसहरवासीलाई ४० प्रतिशत र २० प्रतिशत लमजुङ जिल्लाका बाँकी गाविस तथा नगरपालिका वासिन्दालाई वितरण गरिने जनाएको छ ।
सेयर निष्काशनका लागि छ्याङ्दीले मंसिर २४ गते धितोपत्र बोर्डबाट अनुमति पाएको थियो ।
