थुप्रै कम्पनीहरु यतिबेला हकप्रद निष्काशनको क्रममा छन् । विशेषतः बैंक तथा वित्तीय संस्थाहरुले पुँजीवृद्धिका लागि हकप्रद सेयर निष्काशनको क्रमलाई तीब्र पारेका छन् । कतिपयले हकप्रद निष्काशन गरिसकेकोछन्, कतिपयले गरिरहेका छन् भने कतिपयले हकप्रद निष्काशनको सबै तयारी पूरा गरी मिति समेत घोषणा गरिसकेका छन् । कतिपय संस्था भने धमाधम हकप्रद निष्काशनको प्रक्रियामा काम गरिरहेका छन् । कुनैले हकप्रद पारित गर्न साधारणसभा बोलाएका छन् भने कुनैले साधारणसभाबाट पारित गरी धितोपत्र बोर्डमा निवेदन दिएको अवस्था छ ।
रिलायबल माइक्रोफाइनान्स वित्तीय संस्था लिमिटेड
रिलायबल माइक्रोफाइनान्स वित्तीय संस्था लिमिटेडले ५० प्रतिशत अर्थात दुई बराबर एकको अनुपातमा हकप्रद सेयर निष्काशन गर्ने भएको छ । कम्पनीको चौथो साधाराणसभाले उक्त हकप्रद निष्काशन गर्ने प्रस्ताव पारित गरेको हो । साथै, सभाले आफ्ना सेयरधनीलाई २० प्रतिशत नगद लाभांश दिने प्रस्ताव समेत पारित गरेको छ । हाल रिलायबलको चुक्ता पुँजी ५ करोड ६५ लाख रुपैयाँ रहेको छ । ५० प्रतिशत हकप्रद सेयर जारी गरेपछि संस्थाको चुक्तापुँजी आठ करोडको हाराहारीमा पुग्नेछ ।
सप्तकोसी डेभलपमेन्ट बैंक
सप्तकोसी डेभलपमेन्ट बैंकले हकप्रद सेयर पारित गर्न पुस २८ गते साधारणसभा बस्ने भएको छ । बैंकले शतप्रतिशत अर्थात एक बराबर एकको अनुपातमा हकप्रद निष्काशन गर्दैछ । बैंकले एक सय रुपैयाँ अंकित दरमा १० करोड रुपैयाँ बराबरका १० लाख कित्ता हकप्रद सेयर निष्काशन गर्न लागेको हो । सेयर निष्काशन तथा विक्री प्रबन्धकमा एनएमबि क्यापिटल लिमिटेडलाई नियुक्त गरेको छ । हकप्रद र साधारणसभा प्रयोजनका लागि बैंकले पुस ८ गतेदेखि २८ गतेसम्म सेयरधनी पुस्तिका बन्द रहने जानकारी गराएको छ । हाल सप्तकोसीको चुक्तापुँजी १० करोड रुपैयाँ रहेको छ । शतप्रतिशत हकप्रद सेयर जारी गरेपछि बैंकको चुक्तापुँजी २० करोड रुपैयाँ पुग्नेछ ।
पूर्णिमा विकास बैंक
पूर्णिमा विकास बैंक लिमिटेडले २५ प्रतिशत अर्थात चार बराबर एकको अनुपातमा हकप्रद सेयर निष्काशन गर्ने भएको छ । केही महिनाअघि मात्रै पचास प्रतिशत हकप्रद सेयर जारी गरेर चुक्तापुँजी ३० करोड रुपैयाँ पुर्याएको बैंकले पुनः ५० प्रतिशत हकप्रद सेयर जारी गर्ने निर्णय गरेको हो । बैंकको आइतबार बसेको १५२ औँ सञ्चालक समितिको बैठकले उक्त प्रस्ताव अघि सारेको हो । उक्त हकप्रद सेयर सम्बन्धित निकायबाट स्वीकृत भई बैंकको आगामी पुष २३ गते बस्ने ९औँ वार्षिक साधारणसभाले पारित गरेपछि निष्काशन गरिनेछ । यसबाहेक, गत आर्थिक बर्षको मुनाफाबाट पूर्णिमाले २६ प्रतिशत बोनस सेयर दिँदैछ । बैंकले बोनस सेयर वितरण गरेपछि कायम चुक्तापुँजीको २५ प्रतिशत हकप्रद निष्काशन गर्न लागेको हो । बैंकले हकप्रद सेयर र बोनस सेयर दुबैको प्रस्ताव साधारणसभामा लैजाँदैछ । २६ प्रतिशत बोनसपछि बैंकको पूँजी झन्डै ३८ करोड रुपैयाँ पुग्नेछ । त्यसपछि २५ प्रतिशत हकप्रद जारी गर्दा बैंकको पू्ँजी साढे ४७ करोड रुपैयाँ नाघ्नेछ ।
हाम्रो विकास बैंक
हाम्रो विकास बैंक लिमिटेडले दुई सय प्रतिशत अर्थात एक बराबर दुईको अनुपातमा हकप्रद सेयर निष्काशन गर्ने भएको छ । बैंक सञ्चालक समितिको मंगलबार बसेको बैठकले सो निर्णय गरेको हो । आगामी पुस २९ गते बस्ने बैंकको आर्ठौँ वार्षिक साधारणसभाले हकप्रद निष्काशनको प्रस्ताव पारित गर्दैछ । साधारणसभा तथा हकप्रद प्रयोजनका लागि बैंकले पुस ८ गतेदेखि २९ गतेसम्म सेयरधनीले पुस्तिका बन्द रहने जनाएको छ । हाल हाम्रो विकास बैंकको चुक्ता पुँजी १२ करोड २३ लाख रुपैयाँ छ । हकप्रद जारी गरेपछि बैंकको पुँजी ३६ करोड ६९ लाख रुपैयाँ पुग्नेछ ।
मञ्जुरी फाइनान्स लिमिटेड
मञ्जुरी फाइनान्स लिमिटेडले १७५ प्रतिशत अर्थात एक बराबर एक दशमलव ७५ को अनुपातमा हकप्रद सेयर निष्काशन गर्दैछ । यसका लागि फाइनान्सले धितोपत्र बोर्डको अनुमति पाइसकेको छ । कम्पनीले ४३ लाख ८६ हजार तीन सय ७५ रुपैयाँ बराबरको हकप्रद सेयर निष्काशन गर्न लागेको हो । उक्त हकप्रद सेयर पारित गर्न फाइनान्सले आफ्नो ९औँ वार्षिक साधारणसभा पुस २९ गते बस्ने भएको छ । हकप्रद तथा साधारणसभा प्रयोजनका लागि मञ्जुश्रीले पुस ९ गतेदेखि २९ गतेसम्म सेयरधनी पुस्तिका बन्द गर्ने निर्णय गरेको छ । फाइनान्सको गत शुक्रबार (पुस १ गते) बसेको सञ्चालक समितिको बैठकले सो निर्णय गरेको हो । सेयर निष्काशन तथा विक्री प्रबन्धकमा कम्पनीले एस क्यापिटल लिमिटेडलाई नियुक्त गरेको छ । हाल फाइनान्सको चुक्तापुँजी २५ करोड रुपैंया रहेको छ । यसबाहेक फाइनान्सले गत आर्थिक वर्षको कमाईबाट लगानीकर्तालाई १४ प्रतिशत बोनस बितरण गर्ने प्रस्ताव पनि अघि सारेको छ । हकप्रद निष्काशन तथा प्रस्तावित बोनस बितरण पश्चात फाइनान्सको चुक्ता पुँजी ६८ करोड ९२ लाख रुपैयाँ नाघ्नेछ ।
यती डेभलपमेन्ट बैंक
यती डेभलपमेन्ट बैंक लिमिटेडले ५० प्रतिशत अर्थात एक बराबर एकको अनुपातमा हकप्रद सेयर जारी गर्ने भएको छ । हकप्रद निष्काशनको अनुमति माग गर्दै बैंकले धितोपत्र बोर्डमा निवेदन दिएको छ । बैंकको १४ औ बार्षिक साधारणसभाले ५० प्रतिशत हकप्रदको प्रस्ताव पारित गरेको थियो । उक्त हकप्रद सेयरको निष्काशन तथा विक्री प्रबन्धकमा बैंकले एन.सि.एम.मर्चेन्ट बैंकिङ्ग लिमिटेडलाई नियुक्त गरेको छ । यतीले हाल कायम चुक्तापुँजी एक अर्ब ३८ करोड ६२ लाख ३३ हजार रुपैयाँको ५० प्रतिशत अर्थात ६९ करोड ३१ लाख १६ हजार रुपैयाँ बराबरको ६९ लाख ३१ हजार कित्ता हकप्रद सेयर जारी गर्न लागेको हो । हकप्रद सेयर जारी गरेपछि यतीको चुक्तापुँजी दुई अर्ब सात करोड रुपैयाँ पुग्छ । राष्ट्रिय स्तरको विकास बैंकको रुपमा टिकिरहन यतीले असार मसान्तभित्रमा अझै ४३ करोड रुपैयाँ पुँजी थप गर्नुपर्ने हुन्छ । यसका लागि बैंकले चालू आर्थिक वर्षको मुनाफाबाट बोनस सेयर जारी गर्ने योजना बनाएको छ ।
