चालू आर्थिक वर्षको पहिलो त्रैमासमा कतिपय बैंकहरुको नाफा तथा प्रगति विवरण हेर्दा नेपालको वित्तीय क्षेत्र सबल बन्दै गएको भान हुन्छ । पहिलो त्रैमासमा नै एक अर्बमाथिको नाफा आर्जन गरेर नेपाल बैंक उदाहरणीय बनेको छ । निजीस्तरका नविल बैंक र नेपाल इन्भेष्टमेन्ट बैंकले पौने एक अर्ब नाफा कमाएका छन् । कतिपय बैंकको नाफा भने एकदमै न्यून देखिएको छ । २८ वटा वाणिज्य बैंकमध्ये, पाँच वटा बैंकको नाफा १ करोडदेखि १५ करोड बिचमा रहेको छ ।
सिभिल बैंकको नाफा १ करोड ४५ लाख
सिभिल बैंक लिमिटेडले चालु आर्थिक वर्षको पहिलो त्रैमासमा १ करोड ४५ लाख रुपैयाँ खुद मुनाफा आर्जन गरेको छ । बैंकको मुनाफा गत आर्थिक वर्षको सोही अवधिको तुलनामा ७५ दशमलव २३ प्रतिशतले घटेको हो । गत आर्थिक वर्षको पहिलो त्रैमासमा सिभिलले ५ करोड ८७ लाख रुपैयाँ मुनाफा कमाएको थियो । ३ अर्ब ८ करोड रुपैयाँ चुक्ता पूँजी भएको सिभिल बैंकले निक्षेपमा गत आर्थिक वर्षको पहिलो त्रैमासको तुलनामा १४ दशमलब ५० प्रतिशतले वृद्धि गरी ३१ अर्ब ३४ करोड १२ लाख रुपैयाँको संकलन गरेको छ । कर्जातर्फ बैंकले १२ दशमलव १२ प्रतिशत वृद्धि गरी २६ अर्ब ३४ करोड १३ लाख रुपैयाँ लगानी गरेको छ । यो अवधिमा सिभिल बैंकको खुद व्याज आम्दानी ५७ दशमलव ९३ प्रतिशतले बढेर २२ करोड ९७ लाख रुपैयाँ पुगेको छ । त्यस्तै, बैंकले ३२ करोड ११ लाख ८९ हजार रुपैयाँ सञ्चालन मुनाफा गरेको छ । गत आर्थिक वर्षको पहिलो त्रैमासमा बैंकको यस्तो मुनाफा २१ करोड सात लाख ६१ हजार रुपैयाँ थियो । पहिलो त्रैमासमा १६ करोड ३२ लाख रुपैयाँ खराब कर्जा उठाएको बैंकले प्रोभिजनमा ३२ करोड ६४ लाख रुपैयाँ राखेको छ भने जगेडाकोषमा ५३ करोड रुपैयाँ राखेको छ । असोज मसान्तसम्ममा बैंकको बैंकको निष्कृय कर्जा ४ दशमलव १३ प्रतिशत रहेको छ भने जोखिमयुक्त सम्पति १२ दशमलव २७ प्रतिशत रहेको छ । बैंकको प्रति शेयर आम्दानी १ दशमलव ८५ रुपैयाँ, प्रति शेयर नेटवर्थ १ सय १७ दशमलव ४५ रुपैयाँ र तरलता अनुपात २३ दशमलव ०६ प्रतिशत रहेको छ ।
जनता बैंकको नाफा ६ करोड ३९ लाख
जनता बैंक लिमिटेडले चालु आर्थिक वर्षको पहिलो त्रैमासमा ६ करोड ३९ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा १० दशमलव ५२ प्रतिशत बढी नाफा कमाएको हो । गत आर्थिक वर्षको पहिलो त्रैमासमा जनताले ५ करोड ७५ लाख रुपैयाँ नाफा कमाएको थियो । २ अर्ब ६ करोड रुपैयाँ चुक्ता पुँजी भएको जनता बैंकले निक्षेपमा गत आर्थिक वर्षको पहिलो त्रैमासको तुलनामा १३ दशमलव ६३ प्रतिशत वृद्धि गरी २५ अर्ब २५ करोड ३ लाख रुपैयाँ संकलन गरेको छ । कर्जातर्फ बैंकले १० दशमलव ५२ प्रतिशत बढाएर २१ अर्ब ८० करोड ९२ लाख रुपैयाँ लगानी गरेको छ । बैंकको खुद व्याज आम्दानी गत वर्षको असोज मसान्तको तुलनामा ११ दशमलव ९७ प्रतिशतले बढेर १८ करोड ७२ लाख रुपैयाँ पुगेको छ । त्यस्तै, सञ्चालन मुनाफा ९ करोड ५८ लाख रुपैयाँ पुगेको छ । यो अवधिमा ५९ लाख रुपैयाँ खराबकर्जा उठाएको बैंकले प्रोभिजनमा ४ करोड ८२ लाख रुपैयाँ राखेको छ भने जगेडाकोषमा ६८ करोड २६ लाख रुपैयाँ राखेको छ । असोज मसान्तसम्ममा बैंकको निष्कृय कर्र्जा १ दशमलव १८ प्रतिशत र जोखिमयुक्त सम्पति १२ दशमलव १४ प्रतिशत रहेको छ । त्यस्तै, बैंकको प्रतिशेयर आम्दानी १२ दशमलव ४२ रुपैयाँ, मुल्य आम्दानीेको अनुपात ४३ गुणा, प्रति शेयर नेटवर्थ १ सय ३३ दशमलव १४ रुपैयाँ, तरलता अनुपात २४ दशमलव १० प्रतिशत रहेको छ ।
एनसीसी बैंकको नाफा १२ करोड ९० लाख
नेपाल क्रेडिट एण्ड कमर्स बैंक लिमिटेड (एनसीसी)ले चालु आर्थिक वर्षको पहिलो त्रैमासमा १२ करोड ९० लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको पहिलो त्रैमासको तुलनामा १ दशमलव ५७ प्रतिशतले बढी नाफा कमाएको हो । गत आर्थिक वर्षको पहिलो त्रैमासमा एनसीसीले १२ करोड ७१ लाख रुपैयाँ नाफा कमाएको थियो । २ अर्ब ३५ करोड ३१ लाख रुपैयाँ चुक्ता पूँजी भएको बैंकले गत वर्षको असोज मसान्तको तुलनामा निक्षेपमा २० प्रतिशतले वृद्धि गरी ३० अर्ब ६३ करोड ३० लाख रुपैयाँ संकलन गरेको छ । कर्जातर्फ बैंकले १९ प्रतिशत बढाएर २५ अर्ब ८९ करोड ३४ लाख रुपैयाँ लगानी गरेको छ । खुद व्याज आम्दानी र सञ्चालन मुनाफामा बैंकले राम्रै प्रगति गरेको देखिन्छ । यो अवधिमा बैंकको खुद ब्याज आम्दानी २० दशमलव ३९ प्रतिशतले बढेर २४ करोड २४ लाख रुपैयाँ पुगेको छ । संचालन मुनाफा २७ दशमलव ८१ प्रतिशतले बढेर १७ करोड ४ लाख रुपैयाँ पुगेको छ । तीन महिनाको अवधिमा ३ करोड २३ लाख रुपैयाँ खराब कर्जा उठाएको एनसीसीले प्रोभिजनमा ३ करोड ४ लाख रुपैयाँ राखेको छ भने १ अर्ब ५३ करोड ३० लाख रुपैया जगेडा कोषमा राखेको छ । असोज मसान्तसम्ममा बैंकको निष्क्रिय कर्जा शुन्य दशमलव ८५ प्रतिशतले घटेर शुन्य दशमलव ९६ प्रतिशतका कायम भएको छ भने जोखिमयुक्त सम्पति शुन्य दशमलव ५ प्रतिशतले बढेर ११ दशमलव ८७ प्रतिशत पुगेको छ । बैंकको प्रति शेयर आम्दानी २१ दशमलव ६९ रुपैयाँ, प्रति शेयर नेटवर्थ १ सय ६५ दशमलव १५ रुपैयाँ, तरलता अनुपात २२ दशमलव ३४ प्रतिशत र मूल्य आम्दानी अनुपात १६ दशमलव ७४ गुणा रहेको छ ।
कुमारी बैंकको नाफा पौने १४ करोड
कुमारी बैंक लिमिटडले चालू आर्थिक वर्षको पहिलो त्रैमासमा १३ करोड ७४ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा १ सय ८५ दशमलव ४१ प्रतिशत बढी नाफा कमाएको हो । गत आर्थिक वर्षको पहिलो त्रैमासमा कुमारीले ४ करोड ८६ लाख रुपैयाँ नाफा कमाएको थियो । २ अर्ब ६९ करोड चुक्ता पुँजी भएको बैंकको खुद व्याज आम्दानी गत आर्थिक वर्षको पहिलो त्रैमासको तुलनामा ४८ दशमलव ०२ प्रतिशतले बढेर २६ करोड २५ लाख रुपैयाँ पुगेको छ । त्यस्तै, सञ्चालन मुनाफा १ सय ४० दशमलव ६२ प्रतिशतले बढेर १५ करोड ४९ लाख रुपैयाँ पुगेको छ । यो अवधिमा बैंकले निक्षेपमा १७ दशमलब ६४ प्रतिशतले वृद्धि गरी ४० अर्ब ३५ करोड ६९ लाख रुपैयाँ संकलन गरेको छ । कर्जातर्फ बैंकले गत आर्थिक वर्षको पहिलो त्रैमासको तुलनामा १८ दशमलव ५१ प्रतिशतले बढाएर ३२ अर्ब ४१ करोड ११ लाख रुपैयाँ लगानी गरेको छ । यो अवधिमा ५ करोड ७८ लाख रुपैयाँ खराब कर्जा उठाउन सफल भएको कुमारी बैंकले प्रोभिजनमा ६ करोड २६ लाख रुपैयाँ राखेको छ । असोज मसान्तसम्ममा बैंकको निष्कृय कर्जा १ दशमलव २६ प्रतिशत रहेको छ भने जोखिमयुक्त सम्पत्ति ११ दशमलव ३३ प्रतिशत रहेको छ । कुमारी बैंकको प्रति शेयर आम्दानी ३१ दशमलव ४९ रुपैयाँ, मुल्य आम्दानीको अनुपात १९ दशमलव ५९ गुणा, प्रति शेयर नेटवर्थ रु १ सय ५५ दशमलव ६४ रुपैयाँ र तरलता अनुपात २८ दशमलव ५२ प्रतिशत रहेको छ ।
मेगा बैंकको नाफा १४ करोड ६९ लाख
मेगा बैंक लिमिटेडले चालु आर्थिक वर्षको पहिलो त्रैमासमा १४ करोड ६९ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा ७३ दशमलव ८० प्रतिशत बढी नाफा कमाएको हो । गत आर्थिक वर्षको पहिलो त्रैमासमा मेगाले ८ करोड ४३ लाख रुपैयाँ नाफा कमाएको थियो । ३ अर्ब २४ करोड रुपैयाँ चुक्ता पूँजी भएको मेगा बैंकले निक्षेपमा ६३ दशमलव ६३ प्रतिशतले वृद्धि गरी ३६ अर्ब ७७ करोड ४१ लख रुपैयाँ संकलन गरेको छ । जसबाट बैंकले कर्जामा ३१ अर्ब ८१ करोड ९० लाख रुपैयाँ लगानी गरेको छ । जुन गत वर्षको सोहि अवधिभन्दा ७२ दशमलव २२ प्रतिशतले बढी हो । त्यस्तै, बैंकको खुद व्याज आम्दानी ७९ दशमलव ७९ प्रतिशतले बढेर ३५ करोड ६७ लाख रुपैयाँ पुगेको छ । संचालन मुनाफा ५४ दशमलव ३८ प्रतिशतले बढेर १७ करोड ६२ लाख रुपैयाँ पुगेको छ । यो अवधिमा ५ करोड ५० लाख रुपैयाँ खराब कर्जा उठाएको बैंकले जगेडाकोषमा १ अर्ब ११ करोड १६ लाख रुपैयाँ राखेको भने प्रोभिजनमा ११ करोड ४८ लाख रुपैयाँ राखेको छ । बैंकको निष्कृय कर्जा शुन्य दशमलव ५२ प्रतिशतले घटेर १ दशमलव ०८ प्रतिशत कायम भएको छ भने जोखिमयुक्त सम्पत्ति २ दशमलव ४५ प्रतिशतले घटेर ११ दशमलव ५८ प्रतिशत कायम भएको छ । असोज मसान्तसम्ममा मेगा बैंकको प्रतिशेयर आम्दानी ४ दशमलव ५३ रुपैयाँ, मुल्य आम्दानीको अनुपात २८ दशमलव ३८ गुणा, प्रतिशेयर नेटवर्थ १ सय ३४ दशमलव ३१ रुपैयाँ र तरलता अनुपात २१ दशमलव ६९ प्रतिशत रहेको छ ।
