यसपालिको दसैँमा नेपाल राष्ट्र बैंकले झण्डै सवा ५८ अर्बको नयाँ नोट साटही गरेको छ । नेपाल राष्ट्र बैंक मुद्रण विभागका अनुसार सर्वसाधरणका लागि बडा दसैँको फुलपातिसम्म ५८ अर्ब ९ करोड ३२ लाखको नयाँ नोट बजारमा प्रवाह गरेको हो । राष्ट्र बैंकले दसैंका लागि असोज ९ गतेदेखि १४ गतेसम्म बैंक तथा वित्तीय संस्थालाई नयाँ नोट उपलब्ध गराएको थियो भने सर्वसाधारणका लागि १६ गते आइतबारदेखि २१ गते शुक्रबारसम्म नोट साट्ने सुविधा दिएको थियो ।
फुलपतिसम्म ४९ अर्बको पाँच सय र हजार तथा बाँकी ५, १०, २०, ५० र १०० का नोट साटिएको मुद्रण विभागका कार्यकारी निर्देशक भुवन कँडेलले जानकारी दिए । बैंक तथा वित्तीय संस्थाले भुक्तानीमा ठूलो दरका नोट प्रयोग गर्ने गर्छन् । ठूला नोटमध्ये करिब ५६ प्रतिशत भुक्तानीका लागि उपयोग हुने गरेको छ ।
साना नोटले बजारमा खुद्रा भुक्तानीलाई सहजता प्रदान गर्ने बताइएको छ । कतिपय उपभोक्ताले दसैंका अवसरमा वर्षदिनभरि विशेषगरी पूजाआजा गर्न तथा सांस्कृतिक पर्वलाई समेत पुग्ने गरी नयाँ नोट साट्ने गरेको पाइएको छ ।
पुराना वा ठूलो दरका नोटसँग साना दरका नयाँ नोट सटही सुविधासहित राष्ट्र बैंकले बजारमा हरेक वर्ष नयाँ नोट प्रवाह गर्दै आएको छ । राष्ट्र बैंकले हरेक वर्ष दसैंअघि नयाँ नोट बजारमा पठाउने गरेको छ । दसैं पुराना नोट खिच्ने र नयाँ नोट प्रवाह गर्ने अवसर रहेको राष्ट्र बैंकले जनाएको छ । गत वर्ष एकजनालाई २२ हजार रुपैयाँमात्रै सटही सुविधा उपलब्ध गराएको राष्ट्र बैंकले यस पटक भने एक व्यक्तिलाई ३७ हजार रुपैयाँसम्म नयाँ नोट उपलब्ध गराएको थियो । राष्ट्र बैंकले दसैंमा नोट सटही सुविधा दिएको समयमा साटिएको मुद्राले बजारमा मूल्यवृद्धिमा खासै असर नपर्ने राष्ट्र बैंकले जनाएको छ ।
