चालू आर्थिक वर्षको पहिलो महिनामा रेमिट्यान्स आप्रवाह ओरालो लागेको छ । नेपाल राष्ट्र बैंकका अनुसार, साउन महिनामा रेमिट्यान्स आप्रवाह २.५ प्रतिशतले घटेर ५१ अर्ब ९४ करोडमा सीमित भएको छ । गत आर्थिक वर्षको पहिलो महिना अघिल्लो वर्ष सोही महिनाको तुलनामा २६.३ प्रतिशतले बढेको थियो । अघिल्लो साउनमा ५३ अर्ब २७ करोड रेमिट्यान्स नेपाल भित्रिएकोमा चालु आर्थिक वर्षको साउनमा भने १ अर्ब ३३ करोड कम भित्रिएको छ ।
गत वर्ष भुइँचालोपछि वैदेशिक रोजगारीमा जाने नेपालीको संख्यामा उल्लेख्य कमी आएपछि रेमिट्यान्स ओरालो लाग्ने क्रममा छ । श्रम विभागका अनुसार गत आर्थिक वर्षमा बिदेसिने नेपालीको संख्या १८.४ प्रतिशतले घटेको छ । गत आर्थिक वर्ष ०७२÷७३ मा कुल ६ खर्ब ६५ अर्ब ६ करोड रेमिट्यान्स नेपाल भित्रिएको थियो ।
