मिलेमतोमा दावी भुक्तानी दिने काम बन्द गर्न अध्यक्ष सिलवालको निर्देशन

बैंकिङ खबर/बीमा समितिका अध्यक्ष सूर्यप्रसाद सिलवालले बीमा कम्पनीहरुले दाबी भुक्तानी सेवालाई सरल र सहज बनाउन आवश्यक रहेको बताएका छन् ।
मंगलबार काठमाडौंमा आयोजित कार्यक्रममा बोल्दै अध्यक्ष सिलवालले नेपालका बीमा कम्पनीहरुले बीमितलाई भुक्तानी दिने विषय समस्याको रुपमा रहेको बताए । बीमा कम्पनीहरुले मिलेमतोमा मात्रै भुक्तानी दिने गरेको उल्लेख गर्दै त्यसलाई सुधार्न निर्देशन समेत दिए । मिलेमतो हुने बीमितले समयभन्दा अगाडि नै भुक्तानी पाउने तर मिलेमतो नभए भुक्तानी पाउनै नसक्ने अवस्थाको अन्त्य हुनुपर्ने बताए ।

यस्तै रेट कटिङ्ग र उधारो बीमा पनि बीमा कम्पनीहरुमा देखा परेको अर्को ठूलो समस्या रहेको उनको भनाइ छ । रेट कटिङ, उधारो बीमा र भुक्तानीमा मिलेमतो लगायतका समस्यालाई सुधार नगर्दा सम्म बीमा क्षेत्रको विकास सम्भव नभएको पनि अध्यक्ष सिलवालले बताए । केहि बीमा कम्पनीहरुले उधारो बीमाको अभ्यास गरेको देखिएको भन्दै उनले जबसम्म पैसा हुँदैन तब सम्म पोलिसी जारी हुन नसक्ने ऐनमा व्यवस्था रहेको तर्फ सचेत गराए । यस्तै निर्जीवन बीमा कम्पनीमा भुक्तानीमा मिलेमत्तोको समस्या देखिएको बताए ।


सोसिअल मेडिया