यसअघि नै ५७ अर्ब दिइसकेको विश्व बैंकद्वारा थप २३ अर्ब ऋण स्वीकृत
भूकम्पपछिको आवास पुनर्निर्माणमा विश्व बैंकले नेपाललाई सहयोग ७० करोड अमेरिकी डलर (करिब ८० अर्ब रुपैयाँ) पुर्याएको छ । हालै थप २० करोड डलर (करिब २३ अर्ब रुपैयाँ) ऋण स्वीकृत गरेसँगै पुनर्निर्माणमा विश्व बैंकको ऋणको आकार ८० अर्ब रुपैयाँ पुगेको हो । विश्व बैंकले पुनर्निर्माण परियोजनामा यसअघि नै ५० करोड अमेरिकी डलर सहयोग गरिसकेको छ ।
यसअघि जस्तै अहिलेको ऋण सहयोग पनि सर्वसाधारणलाई भूकम्पप्रतिरोधी आवास निर्माण गर्न खर्च हुने विश्व बैंकले जनाएको छ । यो सहयोगबाट थप ८६ हजार ६ सय ८० आवास पुनर्निर्माण हुने विश्व बैंकले उल्लेख गरेको छ । २०७२ सालमा गएको विनाशकारी भूकम्पबाट नेपालको कुल गार्हस्थ उत्पादनको करिब ३३ प्रतिशत क्षति भएको नेपाल सरकारको अध्ययनले देखाएको थियो । भूकम्पपछिको पुनर्निर्माणलाई करिब ७ खर्ब रुपैयाँ आवश्यक पर्ने पनि अध्ययनले देखाएको छ ।
‘विनाशकारी भूकम्पपछि नेपालले सुरु गरेको पुनर्निर्माणका क्रममा कोही पनि पीडित नछुटून् भन्ने विश्व बैंकको उद्देश्य हो,’ विश्व बैंकका नेपाल निर्देशक आइडा सरायी–रिड्डिहाफले बताए । नेपाली जनताको आवास मात्रै होइन, जीवनलाई पनि पुनर्निर्माण गर्ने काममा विश्व बैंकले नेपाल सरकारलाई सघाइरहेको उनले बताए ।
विश्व बैंकको सहयोगमा यसअघि गरेको सहयोगबाट १ लाख ५१ आवास पुनर्निर्माणलाई सहयोग दिइसकिएको छ । आवास पुनर्निर्माणका लागि सरकारले भूकम्पपीडितको प्रतिपरिवार ३ लाख रुपैयाँ अनुदान उपलब्ध गराउँदै आएको छ । नयाँ पत्रिका दैनिकमा प्रकाशित समाचार ।
