आवास निर्माणका लागि अनुदान उपलब्ध गराउने भनिएका बैंकहरु भूकम्प प्रभावित जिल्ला काभ्रेका ग्रामिण क्षेत्रमा अझै पुग्न सकेका छैनन । जिल्लाको विकट गाविसहरूमा भन्दा पनि सदरमुकामबाट नजिक र यातायातको सुविधा भएका स्थानमा मात्र बैङ्कहरू तोकिएका छन् । यातायात नपुगेका डाँडापारि तथा कोशीपारिका गाविसका लागि बैङ्क पुग्न नसकेका हुन् । भूकम्प पीडितलाई अनुदान रकम वितरण गर्न जिल्लाका २७ गाविसमा बैङ्कहरू तोकिएका छन् । जिल्लामा ७५ गाविस र ५ नगरपालिकामध्ये २७ वटा गाविसका नाम तोकेर भूकम्पपीडितलाई अनुदान रकम उपलब्ध गराउन बैङ्क आएको जिल्ला विकास समिति काभे्रका अनुगमन, मूल्याङ्कन तथा योजना अधिकृत द्योलकप्रसाद ढकालले जानकारी दिए । २७ गाविसमा कुन बैङ्कले खाता खोल्ने भन्ने सूूची मात्र जिल्ला विकासमा आएको जानकारी दिँदै ढकाल अन्य गाविसको बारेमा जानकारी आइ नसकेको बताए । जिल्लामा हाल सञ्चालनमा रहेका २९ बैङ्क तथा २ वटा फाइनान्सलाई भूकम्प पीडितका लागि अनुदान रकम वितरणको जिम्मा दिइएको छ । लामो समयदेखि बैङ्क नतोकिँदा सम्झौता भएर पनि रकम पाउन नसकेका पीडितले अव भने छिटै राहत पाउने आशा व्यक्त गरेका छन् । दुर्गम गाउँका पीडितले भने यो सेवालिन अझै केही समय पर्खनुपर्ने अवस्था रहेको ढकाल बताउँछन् ।
अनुदान दिन कस्तो प्रगति भयो त ?
जिल्लामा भूकम्पपीडित अनुदान रकम सम्झौता सुरु भएको छ । गाविस सचिवहरू मार्फत प्रत्येक गाविसहरूमा अनुदान रकम सम्झौता सुरु भएको हो । जिल्ला विकास समिति काभे्रले प्रत्येक गाविसमा भूकम्पपीडित अनुदान सम्झौता गर्न सचिव पठाइसकेको जनाएको छ । पूर्वतयारीविना नै जिल्ला विकास समितिले गाविस सचिवहरूलाई अनुदान सम्झौता गर्न पठाएको सचिवहरूको गुनासो छ । ‘जेसुकै होस्, जसरी हुन्छ सम्झौता गरेर आउनु भनेर पठाएको छु’ एक गाविस सचिवले नाम नछाप्ने शर्तमा भने । सचिवहरूलाई गुनासो फारमसहित गाउँगाउँमा पठाएको भए पनि उनीहरूलाई चाहिने जनशतिm नपठाउँदा कार्यबोझ थपिएको सचिवहरूको गुनासो छ । वर्षा सुरु भएसँग अनुदान रकम सम्झौता गरिएको भए पनि पीडितहरूको बैङ्क खाता भने खुलेको छैन । जिल्ला विकास समिति काभे्रपलाञ्चोकका स्थानीय विकास अधिकारी रामकृष्ण उप्रतीले भने, ‘अब सबै गाविस र नगरपालिकामा सम्झौता हुन्छ र काम अगाडि बढ्छ ।’ शुक्रबारसम्ममा ५ हजार ५ जनाले सम्झौता गरेको र २ हजार ९७० गुनासो आएको जिल्ला विकास समितिका प्रशासकीय अधिकृत ढकालले जानकारी दिए ।
सम्झौता नगर्ने गाविसहरु
जिल्लाका ९ गाविसबाट वास्तविक पीडितको नाम नआएसम्म सम्झौता गर्न नदिने भन्दै जिल्ला विकासमा दलहरूले पत्र बुझाएका छन् । गाविसमा क्रियाशील रहेका दलहरूले संयुतm रूपमा पत्र लेखी वास्तविक पीडितको नाम समावेश नभएसम्म सम्झौता हुन नसक्ने भन्दै पत्र बुझाएका हुन् । जिल्ला विकास समितिका प्रशासकीय अधिकृत ढकालले ९ गाविसबाट दलहरूको बैठकको निर्णयसहित पत्र आएको बताए । उनका अनुसार सस्युर्खक, पोखरीनारायण स्थान, मादनकुँडारी, खरेपाँगु, पोखरीचौरी, गोकुले, चलालगणेश स्थान, नाग्रे्रर्चे र चौवासबाट यस्तो पत्र आएको हो ।
