लगानी सम्मेलनमा निजीक्षेत्र : सिमेन्ट उद्योगदेखि केबलकारसम्म सूचीमा

बंगलादेशको निजीक्षेत्र पनि सहभागी हुँदै
काठमाडौं (अस) । आसन्न लगानी सम्मेलनमा बंगलादेशको निजीक्षेत्र पनि सहभागी हुने भएको छ । मंगलवार नेपालका लागि बंगलादेशकी राजदूत मास्फी विन्ते साम्सले ऊर्जा, जलस्रोत तथा सिँचाइ मन्त्री वर्षमान पुनलाई भेटी उक्त जानकारी दिएकी हुन् ।

राजदूत साम्सले नेपालको ऊर्जा क्षेत्रमा लगानीका लागि बंगलादेश सरकार इच्छुक रहेको बताइन् । बंगलादेशले यसअघि नै सन् २०४० भित्र नेपालबाट ९ हजार मेगावाट विद्युत् खरीद गर्ने घोषणा गरिसकेको छ । द्विपक्षीय ऊर्जा सहकार्यका लागि गएको मङ्सिर १८ मा नेपाल र बंगलादेशबीच ऊर्जा सचिवस्तरीय पहिलो बैठक भएको थियो ।

सोही बैठकले नेपालमा लगानीयोग्य जलविद्युत् आयोजनाहरूको पहिचान र विद्युत् व्यापार तथा अन्तरदेशीय प्रसारण लाइनको सम्भावनाबारे अध्ययन गर्न दुवै मुलुकका ३/३ सदस्यीय दुई अलग प्राविधिक टोली गठन गर्ने निर्णय गरेको थियो । सोही अनुसार नेपालतर्फ टोली गठन भइसकेको मन्त्रालयले जानकारी दिएको छ । ‘टोलीमा विद्युत् विकास विभाग, ऊर्जा मन्त्रालय र नेपाल विद्युत् प्राधिकरणका प्रतिनिधि समावेश छन्,’ मन्त्रालयका प्रवक्ता प्रवीणराज अर्यालले आर्थिक अभियानसँग भने ।

भारतको भूमि प्रयोग गरी नेपालको विद्युत् लैजाने बंगलादेशको योजना छ । उक्त योजना सफल बनाउन नेपाल–भारत र भारत–बंगलादेशबीचमा हुने बैठकहरूमा अन्तरदेशीय प्रसारण लाइनसम्बन्धी त्रिपक्षीय व्यवस्था गर्न प्राथमिकताका साथ पहल गर्ने निर्णयसमेत बैठकले गरेको थियो । सोही आधारमा नेपालले गएको माघ १० मा सम्पन्न नेपाल–भारत ऊर्जा सचिवस्तरीय बैठकमा नेपाल–बंगलादेश विद्युत् प्रसारणका लागि भारतको प्रतिक्रिया मागेको थियो । त्यसमा सकारात्मक रूपमा प्रस्तुत भएको भारतीय पक्षले तीनओटै देशको संयुक्त बैठक बसी छलफल गर्न सकिने उपाय सुझाएको थियो ।

मन्त्री पुन र राजदूत साम्सबीच भएको मंगलवारको भेटमा यसअघि दुई देशबीच भएका सहमति र सहकार्यबारे छलफल भएको मन्त्री पुनको सचिवालयले जानकारी दिएको छ । अभियानमा प्रकाशित समाचार ।