आइतबार अन्तिम भन्दै निजी क्षेत्रका २३ परियोजनासहित ७३ परियोजना सम्मेलनमा प्रस्तुत गर्ने तय गरेको लगानी बोर्डमा सोमबार पुनः ४ परियोजना थपिएका छन् । बोर्डमाथि दबाब बढेकाले सोमबार चार परियोजना थपिएका हुन् । बोर्डले भने सोमबारसम्म तय भएका ५० सरकारीसहित ७७ परियोजनालाई नै अन्तिम भनेको छ । सोमबार थपिएकोमा हायात प्यालेस काठमाडौँ, सिटी अफ ड्रिम्स, मुक्तिनाथ दर्शन केबलकार र ३४१ मेगावाटको बूढीगण्डकी जलविद्युत् आयोजना छन् ।
लगानी सम्मेलनको पूर्व तयारीको क्रममा बढी दुई दर्जन प्रश्तुत गर्ने लक्ष्य राखेको सम्मेलनको मुख्य आयोजना लगानी बोर्डले केही परियोजना थपेर ६३ पु-याएको थियो भने फेरि थपेर ६७ पुगेको थियो । सुरुमा सम्भाव्यता अध्ययनदेखि विस्तृत अध्ययन भएका परियोजना मात्र प्रस्तुत गर्ने योजना बनाएको थियो । तर, पछिल्लो समयमा दबाबमा भर्खर पहिचान भएका तथा लागत समेत हचुवामा तय भएका समेत थपिएको लगानी बोर्ड सम्वद्ध स्रोतले जनाएको छ । “आइतबार अर्थमन्त्री एवं बोर्ड उपाध्यक्ष डा. युवराज खतिवडाको अध्यक्षतामा बसेको निर्देशक समितिले ७३ आयोजनालाई अन्तिम भनेपनि सोमबार दबाब परेपछि फेरि थपिएको हो र अझै भन्न नसकिने अवस्था छ,” स्रोतले भन्यो । कारोबारमा प्रकाशित समाचार ।
