नेपाल नागरिक उड्डयन प्राधिकरणले त्रिभुवन अन्तर्राष्ट्रिय विमानस्थलसहित अन्य विमानस्थलहरूमा व्यापारिक प्रयोजनका लागि विभिन्न संघ संस्थालाई दिएको भाडाबापत झण्डै अढाई अर्ब रुपैयाँ बराबरको बक्यौता रकम उठाउन बाँकी रहेको देखिएको छ ।
प्राधिकरणले आइतबार सार्वजनिक लेखा समितिलाई दिएको विवरणअनुसार व्यापारिक प्रयोजनका लागि विभिन्न संघ संस्थालाई दिइएको भाडावापत चालू आर्थिक वर्षको पुस मसान्तसम्म २ अर्ब ४७ करोड ९३ लाख २७ हजार ७ सय ३९ रुपैयाँ बक्यौता रकम उठाउन बाँकी रहेको जनाएको हो । बक्यौता रकम नबुझाउनेमा ५५ वटा चालू अवस्थामा रहेका अन्तर्राष्ट्रिय विमान कम्पनी छन् भने १८ वटा सञ्चालनमा नआएका अन्तर्राष्ट्रिय विमान कम्पनी छन् । यस्तै, चालू अवस्थामा रहेका १८ वटा आन्तरिक उडान भर्ने विमान कम्पनी र १२ वटा सेवा बन्द भएका आन्तरिक उडान भर्ने विमान कम्पनी पनि छन् ।
सबैभन्दा धेरै बक्यौता रकम नतिर्नेमा नेपाल वायुसेवा निगम, एयर एसिया र हिमालयन एयरलाइन्स रहेका छन् । यी कम्पनीले प्राधिकरणलाई क्रमशः ३४ करोड ९ लाख, १४ करोड ८० लाख र ११ करोड ४८ लाख रुपैयाँ तिर्न बाँकी छ । एयर एसियाले हाल नेपालबाट सेवा बन्द गरिसकेको छ । सम्झौता अवधि सकिए पनि यस्ता व्यापारिक संघ संस्थाले अदालतबाट स्टे अर्डर लिँदै व्यापार व्यवसाय सञ्चालन गरिरहेका छन् । प्राधिकरणले तीन वर्षमा टेन्डरमार्फत् विमानस्थलभित्र व्यवसाय गर्न दिने गरेको भए पनि अदालतमा मुद्दा बिचाराधीन रहेको कारणले गर्दा अहिलेको दररेटमा भाडा लगाउन समस्या भएको विमानस्थलका महाप्रबन्धक राजकुमार श्रेत्रीले बताए । उनले धेरै बक्यौता हुने विमान कम्पनीहरूले तीन महिनाभित्र रकम भुक्तानी नगरे विमान ग्राउन्डेड गर्ने तयारी गरेको पनि बताए ।
समितिका सदस्यहरू निजी कम्पनीहरूको यती धेरै बक्यौता हुनु लाजमर्दो भएको भन्दै आक्रोशित भएका छन् । उनीहरूले २०६३ सालमा भएको ठेक्का २०७५ सालसम्म आउँदा पनि एउटै दररेटमा एउटै व्यक्तिले अदालतलाई देखाएर सिन्डिकेट खडा गर्न खोजेको पनि बताएका छन् । उनीहरूले कर्मचारी र व्यवसायीबीच मिलेमतोमा विमानस्थलका व्यवसायीहरूले मन्त्री र सचिवलाई चन्दा दिने गरेको आरोप पनि लगाए ।
समितिले विमानस्थलहरूमा व्यापारिक प्रयोजनका लागि विभिन्न संघ संस्थालाई दिएको भाडा बापतको वक्यौताको विवरण उपलब्ध गराउन प्राधिकरणलाई निर्देशन दिएको छ । समितिका अनुसार आन्तरिकतर्फ हाल बन्द रहेका १२ वटा एयरलाइन्स कम्पनीले त्रिभुवन अन्तर्राष्ट्रिय विमानस्थल कार्यालयलाई बक्यौता चुक्ता नगरी सम्पर्कबाहिर छन् ।
हाल सञ्चालनमा नरहेका र उडान अनुमतिसमेत खारेज भएका आन्तरिकतर्फ उडान भर्ने १२ एयरलाइन्स कम्पनीले विमानस्थल कार्यालयलाई ‘विमानस्थल सेवा शुल्क’ वापतको ८ करोड ४७ लाख ४ हजार रुपैयाँभन्दा बढी रकम तिरेका छैनन् । बन्द रहेकामध्ये कस्मिक र नेकोन एयरको मात्रै ८ करोड रुपैयाँभन्दा बढी बक्यौता रहेको विमानस्थल कार्यालयले जनाएको छ ।
यस्तै, एयर काष्ठमण्डपको ३ लाख २९ हजार, एयर नेपालको ७८ हजार ९ सय, अल्पाइन एयरको ७२ हजार ७ सय, गरुड एयरको २७ हजार ४ सय, कर्णाली एयरको १६ लाख ६४ हजार, मुक्ति एयरलाइन्सको २६ हजार, नेपाल एयरवेजको ११ लाख ७९ हजार, सांग्रिला एयरको २ लाख ३७ हजार र स्काई एयरवेजको ७ लाख ३३ हजार रुपैयाँभन्दा बढी बक्यौता बाँकी रहेको विमानस्थल कार्यालयले समितिलाई जानकारी गराएको छ । कारोबारमा प्रकाशित समाचार ।
