गरिमा विकास बैंक लिमिटेडले काठमाडौँ महानगरपालिका वडा नं. २२, न्युरोडमा आफ्नो ४८औँ शाखा कार्यालयको स्थापना गरेको छ । सोमबार (असोज २३ गते) नेपाल राष्ट्र बैंकका डेपुटी गभर्नर शिवराज श्रेष्ठले उक्त शाखा कार्यालयको उद्घाटन गरे । गरिमा विकास बैंकको यस न्युरोड शाखा कार्यालयबाट ग्राहकहरुले अन्य बैंकिङ सुविधासहित एटिएम र लकर सुविधा समेत प्राप्त गर्ने बैंकका प्रमुख कार्यकारी अधिकृत गोविन्द प्रसाद ढकालले बताए । समुद्घाटन कार्यक्रम गरिमा विकास बैंकका अध्यक्ष चन्द्रकान्त बरालको अध्यक्षतामा सम्पन्न भएको थियो ।
काठमाडौँ महानगरपालिका वडा नं. २, लाजिम्पाटमा केन्द्रीय कार्यालय रहेको गरिमा विकास बैंक लिमिटेड राष्ट्रिय स्तरको विकास बैंक हो । हालै केन्द्रीय कार्यालय पोखराबाट काठमाडौँमा सारेको बैंकले अबको केही समय शाखा विस्तारमा जुट्ने योजना बनाएको छ । जसअनुसार, केही दिनभित्रमा नै रुपन्देहीको मणिग्राम शाखा कार्यालय संचालनमा ल्याउने तयारी भइरहेको सीईओ ढकालले जानकारी दिए । उनका अनुसार, चालू आर्थिक वर्षभित्रमा गरिमा विकास बैंकले प्रदेश नं. १ मा कम्तीमा १० शाखा कार्यालयसहित देशभर १५ वटा थप शाखा कार्यालय स्थापना गर्ने लक्ष्य लिएको छ ।
म्याग्दीको बेनीमा केन्द्रीय कार्यालय रहेको साविकको निलगिरी विकास बैंक र चितवनको नारायणगढमा केन्द्रीय कार्यालय रहेको साविकको शुभेच्छा विकास बैंक लिमिटेडलाई गाभेर सशक्त बन्दै अगाडी बढिरहेको गरिमा विकास बैंकका राजधानीमा छ वटा शाखा कार्यालयसहित देशभर ४८ वटा शाखा कार्यालय र १२ वटा एटिएम संचालनमा रहेका छन् ।
गरिमा विकास बैंकले असोज २२ गतेसम्ममा १५ अर्ब ३० करोड रुपैयाँ निक्षेप संकलन गरी १३ अर्ब ९० करोड रुपैयाँ कर्जा लगानी गरेको छ ।
