निजी क्षेत्रको निर्जीवन बीमा कम्पनी युनाइटेड इन्स्योरेन्स कम्पनी लिमिटेडले चालू आर्थिक वर्षको तेस्रो त्रैमासमा चार करोड ८९ लाख रुपैयाँ खुद मुनाफा आर्जन गरेको छ । कम्पनीले गत आर्थिक वर्षको सोही अवधिको तुलनामा एक सय आठ दशमलव ६९ प्रतिशत बढी नाफा कमाएको हो । गत आर्थिक वर्षको तेस्रो त्रैमासमा युनाइटेडले दुई करोड ३२ लाख रुपैयाँ खुद मुनाफा आर्जन गरेको थियो ।
३० करोड २४ लाख रुपैयाँ चुक्ता पुँजी भएको कम्पनीले जगेडाकोषमा २४ करोड ९३ लाख रुपैयाँ र बीमा कोषमा १८ करोड ३५ लाख रुपैयाँ राखेको छ । कम्पनीको आम्दानी एक सय दुई दशमलव ३८ प्रतिशतले बढेर आठ करोड ५८ लाख रुपैयाँ पुगेको छ भने खर्च ८९ दशमलव ४७ प्रतिशतले बढेर तीन करोड ६८ लाख रुपैयाँ पुगेको छ ।
यो अवधिमा कम्पनीले २८ करोड ४९ लाख रुपैयाँ बीमा शूल्क आर्जन गरेको छ भने आठ करोड ९२ लाख रुपैयाँ बराबरको दाबी भुक्तान गरेको छ । ४७ हजार ५९ वटा बीमालेख जारी गरेको कम्पनीले एक हजार तीन सय दुई वटा दाबी भुक्तान गरेको छ ।
कम्पनीको प्रतिसेयर आम्दानी १६ दशमलव २० प्रतिशत, मुल्य आम्दानीको अनुपात एक सय एक दशमलव ५४ प्रतिशत, प्रतिसेयर नेटवर्थ दुई सय ४८ दशमलव ९४ प्रतिशत र तरलता अनुपात तीन दशमलव ९७ प्रतिशत रहेको छ ।
