निजी क्षेत्रको जीवन बीमा कम्पनी प्राइम लाइफ इन्स्योरेन्स कम्पनीले चालू आर्थिक वर्षको तेस्रो त्रैमासमा १० करोड ७४ लाख रुपैयाँ खुद मुनाफा आर्जन गरेको छ । कम्पनीले गत आर्थिक वर्षको सोही अवधिको तुलनामा १३ दशमलव ८२ प्रतिशत बढी नाफा कमाएको हो । गत आर्थिक वर्षको तेस्रो त्रैमासमा प्राइम लाइफ इन्स्योरेन्सले नौ करोड ४४ लाख रुपैयाँ खुद मुनाफा आर्जन गरेको थियो ।
४८ करोड ८१ लाख रुपैयाँ चुक्तापुँजी भएको कम्पनीले जगेडाकोषमा ७५ करोड २४ लाख रुपैयाँ र जीवन बीमा कोषमा चार अर्ब ४६ करोड ४८ लाख रुपैयाँ राखेको छ । प्राइमको आम्दानी २० दशमलव ७४ प्रतिशतले बढेर १६ करोड ३५ लाख रुपैयाँ पुगेको छ भने खर्च ४० प्रतिशतले बढेर पाँच करोड ६१ लाख रुपैयाँ पुगेको छ ।
यो अवधिमा प्राइम लाइफ इन्स्योरेन्सले बीमा शूल्कवापत एक अर्ब २२ करोड पाँच लाख रुपैयाँ आर्जन गरेको छ भने २१ करोड ३४ लाख रुपैयाँ बराबरको दाबीको भुक्तानी दिएको छ । कम्पनीले पाँच लाख १० हजार आठ सय ७२ वटा बीमा लेख जारी गरको छ भने नौ सय १५ वटा दाबी भुक्तान गरेको छ ।
चैत्र मसान्तसम्ममा प्राइम लाइफ इन्स्योरेन्स कम्पनीको प्रति सेयर आम्दानी २९ रुपैयाँ ३५ पैसा रहेको छ भने प्रतिसेयर नेटवर्थ दुई सय ६५ रुपैयाँ ७५ पैसा रहेको छ । त्यस्तै, कम्पनीको मूल्य आम्दानीको अनुपात ७९ दशमलव ३६ गुणा रहेको छ ।
