जीवन बीमा कम्पनीहरूले कमाए ५ अर्ब ७३ करोड, कुनको कति ?

बैंकिङ खबर/ सञ्चालनमा रहेका जीवन बीमा कम्पनीले गत आर्थिक वर्ष (आव)को चौथो त्रैमासिक वित्तीय विवरण सार्वजनिक गरेका छन् । वित्तीय विवरणअनुसार जीवन बीमा कम्पनीहरूको खुद नाफा अघिल्लो आवको चौथो त्रैमासको तुलनामा गत आवको सोही अवधिमा १५ दशमलव ९ प्रतिशत वृद्धि भएको छ ।

अघिल्लो आवमा १४ जीवन बीमा कम्पनीहरूले कुल रू. ४ अर्ब ९७ करोडभन्दा बढी नाफा कमाएकोमा गत आवमा बढेर रू. ५ अर्ब ७३ करोडभन्दा बढी पुगेको छ ।

१४ कम्पनीमध्ये हिमालयन लाइफ इन्स्योरेन्स कम्पनीले सबैभन्दा बढी नाफा कमाएको छ । गत आवमा यस कम्पनीले रू. ६३ करोड ३८ लाख नाफा कमाएको हो । यो नाफा अघिल्लो आवको तुलनामा २१ दशमलव ५९ प्रतिशत बढी हो । अघिल्लो आवमा कम्पनीले रू. ५२ करोड १२ लाख नाफा कमाएको थियो ।

गत आवमा सर्वाधिक नाफा कमाउने जीवन बीमा कम्पनीको सूचीमा दोस्रोमा सन नेपाल लाइफ इन्स्योरेन्स छ । कम्पनीले रू. ५७ करोड ४९ लाख नाफा कमाएको छ । गत आवमा जीवन बीमा कम्पनीहरूमध्ये राष्ट्रिय जीवन बीमा कम्पनीको नाफा सबैभन्दा कम छ । यस कम्पनीले गत आवमा रू. १५ करोड ३६ लाख नाफा कमाएको हो ।

गत आवमा ११ ओटा जीवन बीमा कम्पनीको नाफा बढ्दा ३ ओटाको नाफा घटेको छ । गत आवमा सन नेपाल लाइफ, मेट लाइफ र लाइफ इन्स्योरेन्स कर्पोरेशन नेपालको नाफा घटेको हो ।

गत आवमा सिटिजन लाइफ इन्स्योरेन्स कम्पनीले प्रतिशतका आधारमा सबैभन्दा बढी नाफा कमाएको छ । गत आवमा कम्पनीको नाफा २१६ प्रतिशत वृद्धि भएको छ । कम्पनीले अघिल्लो आवमा रू.१० करोड २५ लाख नाफा कमाएकोमा गत आवमा बढेर रू. ३२ करोड ४७ लाख पुगेको हो ।

त्यस्तै सूर्यज्योति लाइफ इन्स्योरेन्सको नाफा १४६ प्रतिशत वृद्धि भएको छ । अघिल्लो आवमा कम्पनीले रू. १६ करोड ११ लाख नाफा कमाएकोमा गत आवमा बढेर रू. ३९ करोड ६५ लाख पुगेको छ ।

हेर्नुहोस् कुनको कति ?

स्रोत : गत आवको चौथो त्रैमासिक वित्तीय विवरण ।