बैंकिङ खबर/ चालु आर्थिक वर्ष २०७९/०८० को चार महिनामा बैंक तथा वित्तीय संस्थाबाट सेयर धितोमा प्रवाह हुने कर्जा ५.६ प्रतिशतले घटेको छ । नेपाल राष्ट्र बैंककाअनुसार कात्तिक मसान्तसम्म बैंक तथा वित्तीय संस्थाले ७५ अर्ब ९६ करोड ५ लाख रुपैयाँ कर्जा लगानी गरेका छन् । साउनमा बैंक तथा वित्तीय संस्थाले ८० अर्ब ५० करोड ७८ लाख रुपैयाँ रहेको थियो ।
राष्ट्र बैंककाअनुसार बैंक तथा वित्तीय संस्थाले प्रवाह गर्ने कर्जामा १ करोड रुपैयाँभन्दा माथिको र २५ देखि ५० लाख रुपैयाँसम्मको कर्जा प्रवाह घटेको छ भने ५० लाखदेखि १ करोड र २५ लाख रुपैयाँभन्दा कम जाने कर्जाको आकार बढेको छ ।
राष्ट्र बैंककाअनुसार कात्तिक मसान्तसम्म १ करोडभन्दा माथिको सेयर धितोमा जाने कर्जा ७ प्रतिशतले घटेको छ । कात्तिक मसान्तमा बैंक तथा वित्तीय संस्थाबाट ४३ अर्ब ३२ करोड ५ लाख रुपैयाँ कर्जा प्रवाह भएको छ । साउनमा ४६ अर्ब ५७ करोड ५४ लाख रुपैयाँ रहेको थियो ।
यस्तै २५ देखि ५० लाख रुपैयाँसम्म धितोमा जाने कर्जा पनि घटेको छ । साउन मसान्तसम्म १५ अर्ब २० करोड रुपैयाँ कर्जा प्रवाह भएकामा कात्तिकमा आइपुग्दा १०.७ प्रतिशतले घटेर १३ अर्ब ५७ करोड ५४ लाख रुपैयाँमा सीमित भएको छ ।
नेपाल राष्ट्र बैंककाअनुसार ५० लाखदेखि १ करोड र २५ लाखभन्दा कम रकमको सेयर धितोमा जाने कर्जा भने बढेको छ । साउन मसान्तसम्म १० अर्ब ५६ करोड ३ लाख रुपैयाँ रहेकामा कात्तिक मसान्तमा आइपुग्दा २.१ प्रतिशतले बढेर १० अर्ब ७८ करोड २९ लाख रुपैयाँ कर्जा सेयर धितोका लागि प्रवाह भएको छ ।
२५ लाखभन्दा कम धितोमा जाने कर्जा चार महिनाको अवधिमा १.४ प्रतिशतले बढेको छ । साउनमा ८ अर्ब १७ करोड १४ लाख रुपैयाँ कर्जा प्रवाह भएकामा कात्तिकमा १.४ प्रतिशतले बढेर ८ अर्ब २८ करोड १७ लाख रुपैयाँ पुगेको छ ।
