बैंकिङ खबर । सरकारले आज नयाँ नक्सा सार्वजनिक गरेको छ । भूमि व्यवस्था, सहकारी तथा गरिबी निवारण मन्त्रालयबाट भूमि व्यवस्थामन्त्री पद्मा अर्यालले आज सो नक्सा सार्वजनिक गर्नुभएको हो । जेठ ५ गते बसेको मन्त्रीपरिषद्ले लिपुलेक, लिम्पियाधुरा र कालीपानीसहितको नयाँ नक्सा सार्वजनिक गर्ने निर्णय गरेसँगै मन्त्रालयले आज नयाँ नक्सा सार्वजनिक गरेको हो । राष्ट्रपति विद्यादेवी भण्डारीले जेठ २ गते सरकारको आगामी नीति तथा कार्यक्रम प्रस्तुत गर्ने क्रममा कालापानी, लिपुलेक र लिम्पियाधुरालाई फिर्ता गरिने घोषणा गर्नुभएको थियो । सो पश्चात सोमबारको मन्त्रिपरिषद् बैठकले अतिक्रमित भूमि समेटिएको नेपालको नयाँ नक्सा जारी गर्ने निर्णय गरेको थियो । नयाँ नक्साअनुसार नेपालको कुल क्षेत्रफल १ लाख ४७ हजार ५ सय १६ वर्ग किलोमिटर कायम हुनेछ । हाल नेपालको क्षेत्रफल १ लाख ४७ हजार १ सय ८१ वर्गकिलोमिटर छ । जसमा अतिक्रमित भूभागको क्षेत्रफल ३३५ वर्गकिलोमिटर छ ।
