आर्थिक वर्ष (आव) २०७५/७६ को ६ महीनामा गत आवको सोही अवधिको तुलनामा ऊनी फेल्टका सामग्रीको निर्यात ९ दशमलव ८ प्रतिशतले वृद्धि भएको छ । समीक्षा अवधिमा १ अर्ब ५७ करोड ७७ लाख रुपैयाँ बराबरका सामग्री निर्यात भएका थिए, जुन कुल निर्यातको २ दशमलव १ प्रतिशत अंश हो ।
गत आव २०७४/७५ को सोही अवधिमा ८७ करोड १२ लाख रुपैयाँ बराबरका ऊनी फेल्टका सामग्री निर्यात भएका थिए । आव २०७०/७१ सम्म यस्ता सामग्रीको अंश कुल निर्यातको १ दशमलव ९ प्रतिशत मात्र थियो । पछिल्लो समय ऊनी फेल्टका सामग्रीको निर्यातमा उल्लेख्य सुधार देखिएको व्यापार तथा निकासी प्रवद्र्धन केन्द्रले बताएको छ । आव २०७३/७४ को तुलनामा २०७४/७५ मा ११ दशमलव २ प्रतिशतले यस्ता सामानको निर्यात बढेको थियो ।
ऊनी फेल्टका सामानको मुख्य बजार अमेरिका हो । केन्द्रका कार्यकारी निर्देशक शरदविक्रम राणाका अनुसार नेपालबाट निर्यात हुने ऊनी फेल्टमध्ये दुई तिहाइ अंश अमेरिका जाने गरेको छ । त्यसबाहेक, जर्मनी, क्यानाडा, बेलायत, स्वीट्जरल्यान्ड, फ्रान्स र जापानमा यस्ता सामान निर्यात हुन्छन् । ‘विश्व बजारमा यस्ता सामग्रीको माग राम्रो छ,’ राणाले भने, ‘सरकारी नीतिनियम प्रभावकारी नहुँदा उत्पादन तथा निर्यातमा समस्या देखिने गरेको छ ।’
नेपाल ऊनी फेल्ट तथा निर्यात संघका अध्यक्ष विक्रम थापाका अनुसार हाल करीब २० हजार महिलाले यस्ता उद्योगमा रोजगारी पाएका छन् । ‘यस क्षेत्रमा दक्ष कामदारको अभाव छ,’ उनले भने ।
‘लागतसँगै उत्पादन नबढ्दा उद्योगहरू समस्यामा’
अर्थमन्त्री डा. युवराज खतिवडाले नेपाली उद्योगहरूको लागतसँगै उत्पादन क्षमता बढ्न नसकेको बताएका छन् । सोही कारण त्यस्ता उद्योग समस्यामा रहेको उनको भनाइ छ ।
नेपाल ऊनी फेल्ट तथा निर्यात संघको १०औं वार्षिकोत्सवमा मन्त्री डा. खतिवडाले उद्योगहरूका मेशिन पुराना हुनु, श्रमिकलाई तालीम र थप लगानी अभावका कारणले समस्या देखिएको बताए । मन्त्री डा. खतिवडाले श्रमिकहरूको ज्याला भने बढ्दै गएको उल्लेख गरे । श्रमिकलाई तालीम र उद्योगीलाई सहयोग गर्न सरकार तयार रहेको उनको भनाइ थियो । अभियानमा प्रकाशित समाचार ।
