पछिल्लो सयम नेपाल स्टक एक्सचेञ्ज (नेप्से)को नेतृत्वलाई लिएर सञ्चार माध्यमहरुमा भएको टिकाटिप्पणीप्रति नेप्सेको ध्यानाकर्षण भएको छ । विद्युतीय तथा छापा सञ्चार माध्यमहरुले संस्थाको छविमा आँच पुग्ने गरी तथा नेतृत्वको व्यक्तिगत मानमर्दन गर्ने गरी टिकाटिप्पणी गरेको भन्दै नेप्सेले त्यसको खण्डन गरेको छ ।
यस्तो छ, नेप्सेले विहीबार जारी गरेको प्रेस विज्ञप्ति :
पछिल्लो समय संस्था तथा यसको नेतृत्वलाई लिएर विद्युतीय तथा छापा सञ्चार माध्यमहरुमा भएका टिकाटिप्पणीप्रति नेप्सेको ध्यानाकर्षण भएको छ । संस्थाको छविमा आँच पुग्ने गरी तथा नेतृत्वको व्यक्तिगत मानमर्दन गर्ने गरी भएका टिकाटिप्पणीको खण्डन गर्नु आवश्यक देखिएको छ ।
विगत चार वर्षमा समग्र पुँजी बजारको विकासका लागि नेप्से र यसको नेतृत्वले आफ्नो स्रोत साधनले भ्याएसम्म प्रयास गरेको छ । यी प्रयासहरुले जनस्तरमा अनुभव गर्न सकिने उल्लेख्य परिणाम पनि दिएको छ । नेप्सेकै प्रयासस्वरुप हाल काठमाडौं उपत्यकासहित देशका २२ सहरहरु बाट धितोपत्रको दैनिक कारोबार सम्भव भएको छ । विगत अढाई दशकदेखि धितोपत्रको दोस्रो बजार सेवाबाट वञ्चित सर्वसाधारणले दैनिक कारोबारमा सहज पहुँच पाएका छन् । धितोपत्रको दोस्रो बजार साँचो अर्थमा काठमाडौं बाहिर पुगेको छ । सदस्य दलालको रिमोट वर्क स्टेशन मार्फत दोस्रो बजार कारोबारलाई देशव्यापी बनाउने प्रयासमा अड्चन नआएका होइनन् ।
धितोपत्रको दोस्रो बजार कारोबारलाई कागजी झन्झटमूक्त बनाइएको छ । कागजी धितोपत्र प्रमाणपत्रको कारोबार हुँदै आएको बजारमा नेप्सेको सहायक कम्पनीको रुपमा स्थापित सिडिएस एन्ड क्लियरिङ लिमिटेड स्थापना भएपछि पनि लामो समय गतिहीन अवस्थामा रहेको थियो । नेप्सेको वर्तमान नेतृत्वकै सक्रियतामा सिडिएससी पूर्ण रुपमा सञ्चालनमा आएको र यसको लाभ आम लगानीकर्ताले प्राप्त गरेको तथ्यलाई बिर्सनु हुँदैन ।
दोस्रो बजारमा अन्तर्राष्ट्रियस्तरको आधुनिक अनलाईन स्वचालित कारोबार प्रणाली भित्र्याउने कार्यमा नेप्से लागिरहेको सर्वविदितै छ । सार्वजनिक खरिद ऐन तथा नियमलाई अवलम्बन गरी सुरु गरिएको अत्याधुनिक कारोबार प्रणाली खरिद प्रक्रिया नेप्सेको योजनाअनुसार नै अगाडि बढेको र बाह्य हस्तक्षेप नभएको भए हाल आम लगानीकर्ताले नेपालमै उच्च स्तरको कारोबार प्रणालीमा सरिक हुने अवसर पाइसकेका हुन्थे । नेप्सेले मिति २०७२/११/०४ गते Supply, Delivery, Installation and Commissioning of Internet Based Fully Automated Online Trading System at NEPSE, Contract No: 01/IT/NEPSE/072- 73 को Bidding Document अनुसार YCO Pvt. Ltd सँग सम्झौता गरेको थियो । सम्झौता भएको मितिले १४ महिनाभित्र प्रणाली उपलब्ध गराउने गरी सम्झौता भएको अवस्थामा अनेकौं बखेडा खडा गरी नेप्सेको अत्याधुनिक प्रणाली भित्र्याउने प्रक्रियालाई सुस्त बनाइएको तथ्य कसैबाट लुकेको छैन ।
नेप्सेले आम लगानीकर्तालाई आफ्नो वेभसाइटमार्फत मार्केट डेप्थ देखाउने प्रयासमा पनि वाधाहरु बेहोर्नुपर्यो, अनेकौं कानूनी झञ्झट तेस्र्याइए । ढिलै भए पनि नेप्सेले वेभसाइट मार्फत मार्केट डेप्थ देखाउने कार्यमा सफलता प्राप्त गर्यो । सूचीकृत कम्पनीहरुको धितोपत्रहरुको बजार मूल्यमा प्रभाव पर्ने सूचनाहरु नेप्सेकै वेभसाइट मार्फत सार्वजनिक गर्ने विषयमा पनि नेप्सेले कठिनाई व्यहोर्नुपर्यो । छिटोभन्दा छिटो लगानीकर्तालाई सूचना उपलब्ध गराउनेजस्तो आधारभूत विषयमा असहयोग हुनु बिडम्बनापूर्ण थियो ।
उल्लिखित विषयहरु बाहेक बजारको सुधारका निम्ति थालिएका विविध कार्यहरुलाई सुनियोजित रुपमा रोक्ने अनि नेप्सेले काम गरेन, यसको नेतृत्व असक्षम भयो भन्दै अनर्गल प्रचार गर्ने कार्य अशोभनीय तथा निन्दनीय हो । सकारात्मक दिशामा अगाडि बढेको सक्षम सार्वजनिक संस्थानको छवि धमिल्याएर कसैको हित हुदैन । यस्ता अनर्गल प्रचार र अमर्यादित टिप्पणी नगर्न र त्यस्ता आधारहिन असत्य कुराहरुमा विश्वास नगर्न सम्बन्धित सबैमा आग्रह गरिन्छ ।