बैंकिङ खबर / डिप्रोक्स लघुवित्त वित्तीय संस्थाले चालु आर्थिक वर्ष २०८३/८४ को पहिलो त्रैमासमा २१ करोड ९३ लाख रुपैयाँ खुद नाफा आर्जन गरेको छ । संस्थाको यो नाफा गत आर्थिक वर्षको सोही अवधिको तुलनामा ८.५ प्रतिशत बढी हो । गत वर्षको पहिलो त्रैमासमा संस्थाले २० करोड २२ लाख रुपैयाँ खुद नाफा कमाएको थियो ।
नाफा वृद्धिसँगै संस्थाको ब्याज आम्दानी र सञ्चालन नाफामा समेत सुधार देखिएको छ । असोज मसान्तसम्म संस्थाको खुद ब्याज आम्दानी ५९ करोड ३० लाख रुपैयाँ पुगेको छ । अघिल्लो वर्षको सोही अवधिमा यस्तो आम्दानी ५३ करोड ३५ लाख रुपैयाँ थियो । यस अवधिमा खुद ब्याज आम्दानी करिब ११.२ प्रतिशतले बढेको देखिन्छ ।
त्यस्तै, संस्थाको खुद शुल्क तथा कमिसन आम्दानी ६ करोड ३६ लाख रुपैयाँ रहेको छ । यससँगै कुल सञ्चालन आम्दानी ६५ करोड ७३ लाख रुपैयाँ पुगेको छ । गत वर्षको पहिलो त्रैमासमा २८ करोड ८४ लाख रुपैयाँ रहेको सञ्चालन नाफा बढेर यस वर्ष ३१ करोड ३२ लाख रुपैयाँ पुगेको छ ।
संस्थाको वित्तीय विवरणमा अर्को उल्लेखनीय पक्ष खराब कर्जा अनुपातमा आएको गिरावट हो । गत आर्थिक वर्षको पहिलो त्रैमासमा ८.७३ प्रतिशत रहेको खराब कर्जा अनुपात चालु आर्थिक वर्षको असोज मसान्तमा घटेर ६.७० प्रतिशतमा झरेको छ । यसले अघिल्लोडिप्रोक्स लघुवित्तको नाफा बढ्यो, खराब कर्जा घट्यो वर्षको तुलनामा कर्जा असुली तथा जोखिम व्यवस्थापनमा सुधार आएको संकेत गर्छ । यद्यपि, खराब कर्जा अनुपात अझै ६ प्रतिशतभन्दा माथि रहेकाले कर्जा गुणस्तर सुधारलाई निरन्तरता दिनुपर्ने चुनौती भने कायम छ ।
असोज मसान्तसम्म संस्थाको वितरणयोग्य नाफा १ अर्ब ६२ करोड ८६ लाख रुपैयाँ पुगेको छ । त्यस्तै, संस्थाको चुक्ता पुँजी २ अर्ब ५ करोड ५१ लाख रुपैयाँ र सञ्चित तथा जगेडा कोषसहित कुल इक्विटी ४ अर्ब ८५ करोड ५५ लाख रुपैयाँ रहेको छ ।
संस्थाको वार्षिकीकृत प्रतिसेयर आम्दानी ४२ रुपैयाँ ८१ पैसा कायम भएको छ भने प्रतिसेयर नेटवर्थ २३६ रुपैयाँ २६ पैसा पुगेको छ । यस अवधिमा संस्थाले २ अर्ब ८५ करोड ६३ लाख रुपैयाँभन्दा बढी कर्जा तथा सापटी प्रवाह गरेको छ । ग्राहकबाट संकलित निक्षेप भने १ अर्ब ३४ करोड ८६ लाख रुपैयाँ रहेको छ ।
समग्रमा डिप्रोक्स लघुवित्तले पहिलो त्रैमासमा नाफा वृद्धि र खराब कर्जा अनुपातमा गिरावट दुवै उपलब्धि हासिल गरेको छ । तर लघुवित्त क्षेत्रमा कर्जा असुलीको दबाब र ऋणीको भुक्तानी क्षमतासम्बन्धी चुनौती कायम रहेकाले आगामी अवधिमा खराब कर्जालाई थप घटाउँदै नाफाको वृद्धिलाई निरन्तरता दिनु संस्थाका लागि महत्त्वपूर्ण हुनेछ ।
