हालसम्म ९ वाणिज्य बैंकले सेयर लगानीकर्तालाई दिने लाभांश घोषणा गरेका छन् । गत आर्थिक वर्षको नाफाबाट बैंकहरुले सेयरधनीलाई दिने लाभांश घोषणा गरेका हुन् ।
साधारणसभाबाट पारित भइसकेपछि मात्रै लगानीकर्ताले नगद लाभांश आफ्नो बैंक खातामा र सेयर बोनस डिम्याट खातामा पाउने छन् । सेयर बोनसले लगानीकर्ताको सेयर संख्या थपिन्छ । ‘बुक क्लोज’भन्दा अघिल्लो दिनसम्म सेयर खरिद वा होल्ड गरेकालाई लाभांश दिइन्छ । हालसम्म घोषित लाभांशअनुसार हिमालयन बैंकले सबैभन्दा धेरै कुल २६ प्रतिशत लाभांश घोषणा गरेको छ ।
केही बैंकले बुक क्लोजको मिति घोषणा गरी साधारणसभा आह्वान गरिसकेका छन् । कुमारी बैंकले कात्तिक १६ गते साधारणसभा बोलाएको छ भने ८ गते बुक क्लोजको मिति तोकेको छ । त्यस्तै सिटिजन्स बैंकको पनि १६ गते नै साधारणसभा बस्नेछ । सो बैंकको भने मूल्य समायोजन भइसकेको छ । अर्थात अब सेयर किन्नेले सो बैंकको लाभांश यो वर्ष पाउँदैनन् ।
सानिमाको १४ गते साधरणसभा बस्नेछ, ७ गते बुक क्लोजको मिति तोकेको छ । माछापुच्छ्रेको २६ गते साधारणसभा बस्नेछ भने ७ गते नै बुक क्लोजको मिति तोकेको छ । कान्तिपुर दैनिकमा प्रकाशित समाचार
