सूचक १९ सयनजिक पुग्यो
यस साता नेपाल स्टक एक्सचेन्ज (नेप्से)मा हालसम्मकै उच्च कारोबार हुँदै नयाँ रेकर्ड कायम भएको छ । ३१ अर्ब ५४ करोड बढीको कारोबार भएको सेयर बजारमा नेप्से सूचकसमेतमा निकै सुधार देखिएको हो ।
यस साता २ सय १२ कम्पनीको ३१ अर्ब ५४ करोड ३१ लाख ८८ हजार २ सय रुपैयाँबराबरको ७ करोड ५८ लाख ३८ हजार ८ सय ६४ कित्ता सेयर कारोबार भएको छ । यस साताको अन्तिम कारोबार दिनसम्म आइपुग्दा बजार पुँजीकरण २५ खर्ब ३७ अर्ब ४४ करोड २२ लाख ८९ हजार पुगेको छ ।
सेयर बजारले हालसम्मकै उच्च कारोबार गर्दै ऐतिहासिक कीर्तिमान कायम गरेको छ । नेप्से सूचकले झन्डै ४ वर्ष ४ महिनापछि फेरि आफ्नै ‘अल टाइम हाई’ रेकर्ड तोडेको हो । बिहीबार बजार १ हजार ९ सय २६ दशमलव ९२ बिन्दुको नयाँ रेकर्ड बनाएर सामान्य हिसाबले फर्किएको थियो ।
यसअघि नेप्सेले २०७३ साउन १२ गते १ हजार ८ सय ८१ पुगेर त्यसअघि लगातार घट्दै १ हजार ९९ बिन्दुसम्म आएको थियो । त्यसपछि विभिन्न समयमा उतारचढाव हुँदै गए पनि कोरोना भाइरसको रोकथामका लागि गरिएको लकडाउन खुला भएपछि बजार निरन्तर बढ्न सुरु गरेको हो । त्यसपछि बजार निरन्तर बुलिस प्रवृत्तिमा रहँदै आएको छ ।
‘क’ वर्गका कम्पनीको कारोबार मापन गर्ने सेन्सेटिभ परिसूचक साताको पहिलो दिनको तुलनामा २० दशमलव ११ अंकले बढेर ३ सय ६५ दशमलव १८ को बिन्दुमा आइपुगेको छ
पछिल्लो समय कारोबार रकमले पनि नयाँ नयाँ रेकर्ड कायम गर्दै आएको बजारमा खरिदबिक्री चाप पनि उच्च रहँदा लगानीकर्तामा थप उत्साह जगाएको छ । बैंकबाट सस्तोमा सहज रूपमा सेयर कर्जा उपलब्ध भइरहेका कारण सेयर बजारमा यसको प्रत्यक्ष प्रभाव परेको छ भने अर्कोतर्फ कोरोना भाइरसको असर सबै क्षेत्रमा परेकाले पनि लगानीका अधिकांश स्रोत सेयर बजारमा आकर्षित भएको जानकारको भनाइ छ ।
लगानीकर्ताको मनोविज्ञान सकारात्मक भएको कारण पनि सेयर बजारमा सकारात्मक प्रभाव परेको हो । यसैबीच बजारमा नाफा बुक गर्ने लगानीकर्ता पनि छन् । तर, नयाँ लगानीकर्ता पनि भित्रिएका कारण बजारमा सन्तुलन कायम भएको छ । पछिल्लो समय सरकार र अर्थमन्त्रीले पनि सेयर बजारलाई सकारात्मक रूपमा लिएका कारण लगानीकर्ताको मनोबल उच्च भएको सेयर लगानीकर्ताको भनाइ छ ।
सेयर बजारले चार वर्षको बियरिस सर्कल पार गरेको छ । त्यसपछिको सर्कल बुलिस हो । पछिल्लो समयमा प्रविधिको प्रयोगले पनि लगानीकर्तालाई कारोबार गर्न सहज भएको छ । यसले नयाँ लगानीकर्ता भिœयाउन टेवा पुगेको छ ।
साताभर बढेको नेप्से सूचक एक दिन मात्रै घटेको छ । साताको पहिलो दिन आइतबार ४ दशमलव ६९ अंकले नेप्से बढेर १ हजार ७ सय ८२ दशमलव ८१ को बिन्दुमा पुगेको थियो । सोमबार बजारमा सामान्य करेक्सन देखिएको थियो । त्यो दिन सूचक २ दशमलव ३८ अंकले घटेको थियो । मंगलबार २९ दशमलव ६८ अंकले बढेको बजार साताको चौथो दिन बुधबार सार्वाधिक ६४ दशमलव ७० अंकले बढेको हो । साताको अन्तिम दिन बिहीबारसमेत सूचक १८ दशमलव ४३ अंकले बढेर १ हजार ८ सय ९३ दशमलव २५ को बिन्दुमा आइपुगेको छ ।
यस साता कारोबारमा आएका होटेलबाहेक सबै उपसमूह बढेका छन् । साताको पहिलो दिनको तुलनामा सबैभन्दा बढी उत्पादन तथा प्रशोधन ६ सय ६१ दशमलव ५१ अंकले बढेको हो । त्यस्तै, निर्जीवन बिमा ३ सय ५३ दशमलव २२ अंकले बढेको छ भने व्यापार समूह २ सय ५१ दशमलव १४ अंक, अन्य समूह १ सय ५६ दशमलव शून्य १ अंक, जीवन बिमा १ सय २२ दशमलव २४ अंक, लघुवित्त ९४ दशमलव ९ अंक, जलविद्युत् ५१ दशमलव १६ अंक, वित्त समूह १३ दशमलव ८८ अंक, म्युचुअल फन्ड शून्य दशमलव १६ अंक, बैंकिङ समूह ८५ दशमलव ६४ अंक र विकास बैंक ३१ दशमलव ८८ अंकले बढेको छ । यस साता एक मात्रै होटेल समूह घटेको छ । होटेल २ दशमलव ८९ अंकले घटेको हो ।
यस साता कारोबारमा आएका कम्पनीमा सबैभन्दा बढी कारोबार नेपाल पुनर्बिमा कम्पनीको भएको छ । यसको २ अर्ब ७ करोड ९९ लाख बढीको कारोबार भएको हो । त्यस्तै, नेपाल दूरसञ्चार कम्पनीको १ अर्ब २९ करोड र नेपाल बैंकको १ अर्ब २० करोड बढीको कारोबार भएको हो । यस साता सिभिल लघुवित्त वित्तीय संस्थाको ११ लाख ४१ हजार १ सय ४० कित्ता सेयर नेप्सेमा सूचीकृत भएको छ । नियमित कारोबारका लागि नेप्सेको कारोबार पाँच दिन खुला रहेको छ ।
‘क’ वर्गका कम्पनीको कारोबार मापन गर्ने सेन्सेटिभ परिसूचक साताको पहिलो दिनको तुलनामा २० दशमलव ११ अंकले बढेर ३ सय ६५ दशमलव १८ को बिन्दुमा आइपुगेको छ ।
राजधानी दैनिकमा प्रकाशित समाचार ।
