बीमा समितिले बीमा कम्पनीहरुलाई समयमै वित्तीय विवरण बुझाउन निर्देशन दिएको छ । साथै, समितिले तोकिएको अवधिभित्र नै साधारणसभा सम्पन्न गर्न समेत बीमा कम्पनीहरूलाई निर्देशन दिएको छ । समितिको निर्देशनअनुसार बीमा कम्पनीहरूले एक्चुअरी मूल्याङ्कन गर्नका लागि आर्थिक वर्ष समाप्त भएको दुई महिनाभित्रै समितिसँग स्वीकृति लिनुपर्नेछ । त्यस्तै, आर्थिक वर्ष समाप्त भएको ४ महिनाभित्र लेखापरीक्षण सहितको विवरण बुझाउनु पर्नेछ । समितिले ६ महिनाभित्र वार्षिक साधारणसभा गरी सक्न निर्देशन दिएको छ ।
बिमा ऐन २०४९ को दफा २३ मा ‘बिमकले प्रत्येक आर्थिक वर्ष समाप्त भएको मितिले ६ महिनाभित्रमा बिमा व्यवसायसम्बन्धी आफ्नो सम्पूर्ण कारोबारको बासलात तथा नोक्सानको हिसाब प्रकाशित गरी सोको एकप्रति समितिमा पेस गर्नुपर्नेछ' भन्ने व्यवस्था छ ।
नेपालमा हाल १७ निर्जीवन बिमा कम्पनी र नौ जीवन बिमा कम्पनी सञ्चालनमा छन् । जीवन बीमा कम्पनीहरूले प्रत्येक ३ बर्षमा एक्चुअरी मूल्यांकन गर्नुपर्ने हुन्छ । तर, अहिले भने अधिकांश कम्पनीहरूले प्रत्येक वर्ष यस्तो खालको मूल्यांकन गर्ने गरेका छन् ।
