स्थापनाको पहिलो वर्षमा नै नेपाल पुनर्बिमा कम्पनी आकर्षक नाफा कमाउन सफल भएको छ । कम्पनीले गत आर्थिक वर्ष २०७२/०७३ मा ३० करोड ६५ लाख रुपैयाँ खुद मुनाफा आर्जन गरेको छ । ससस्त्र द्वन्दको समयमा बनाएको आकस्मिक बीमा कोषलाई सरकारले अघिल्लो वर्षमात्रै पुनर्बीमा कम्पनीको रुपमा स्थापित गरेको हो । सरकार र बीमा कम्पनीहरुको लगानी रहेको कम्पनीले गत त्रैमासिक अवधिसम्म कम्पनीले १९ करोड रुपैयाँ नाफा गरेको थियो ।
यो वर्ष कम्पनीले चार करोड ११ लाख रुपैयाँ दावी भुक्तानी गरेको छ । त्यस्तै ११ करोड ५५ लाख दावी भुक्तानी गर्न बाँकी छ । गत आर्थिक वर्षमा कम्पनीले ४८ करोड ६२ लाख रुपैयाँ पुनर्बीमा शुल्क आर्जन गरेको छ । पुनर्बीमा कमिशन आय ४१ करोड रुपैयाँ छ । त्यस्तै कम्पनीले लगानी, कर्जा तथा अन्यबाट दुई करोड ४२ लाख रुपैयाँ आम्दानी गरेको छ ।
