बैंकिङ खबर। अन्तर बैंक सापटी रकमलाई कर्जा–पूँजी–निक्षेप अनुपात (सिसिडी रेसियो) मा गणना गर्न पाउने व्यवस्था भएपछि पछिल्लो समय बैंकहरुको कारोबार बढी देखिएको छ । बैंकरहरुका अनुसार हरेक दिन ४ अर्ब ५० करोड रुपैयाँ भन्दा माथि अन्तरबैंक सापटी कारोबार हुने गरेको छ । यसले बैंकहरुको कारोबार करिब ६ अर्ब पुगेको बैंकरहरु बताउँछन् । त्यस्तै वित्तीय प्रणालीमा दैनिक ३५ अर्ब भन्दा बढी तरलता देखिन्छ । यसले बैंकहरुको कारोबारमा वृद्धि मात्र नभएर वित्तीय प्रणालीमा सहज वातावरण सिर्जना भएको छ ।
नेपाल राष्ट्र बैंकले अन्तर बैंक सापटीलाई सिसिडीमा गणना गर्न दिएपछि बैंकहरुले त्यही पैसालाई ऋणका रुपमा प्रयोग गर्न सक्ने सम्भावना पनि उच्च छ । राष्ट्र बैंकले सिसिडी रेसियो र अनिवार्य तरलता अनुपात (सिआरआर) लाई ब्यवस्थापन गर्न बैंकहरुलाई सहज होस भन्ने उद्येस्यले सिसिडी रेसियोमा गणना गर्ने व्यवस्था गरिदिएको थियो । स्रोतका अनुसार केही बैंकहरुले अन्तर बैंक सापटी रकमको प्रयोग ऋण प्रवाहमा गरेको आशंका पनि छ ।
अहिले बजारमा अन्तर बैंक ब्याजदर झण्डै ६ प्रतिशत सम्म छ । तर त्यही पैसालाई ऋणको रुपमा प्रयोग गर्दा बैंकहरुले १२/१३ प्रतिशतमा लगानी गर्न सक्छन् । त्यसैले पनि यस्तो पैसा ऋणको रुपमा गएको हुन सक्ने आशंका गर्न सकिने ठाउँ रहन्छ । बैंकहरुले कुनै ठाउँबाट निक्षेप आउने आशामा अन्तर बैंकबाट लिएको पैसा तत्काल लागानी गर्ने प्रवृति बसेमा वित्तीय प्रणाली नै जोखिममा पर्न सक्छ ।
