व्यवस्थापनले कर्मचारीमाथि अभद्र व्यवहार गरेको भन्दै नेपाल इन्स्योरेन्स कम्पनीका कर्मचारीहरु आन्दोलनमा उत्रिएका छन् । संस्थागत सुदृढीकरणको माग राखेर शान्तिपूर्ण आन्दोलनमा उत्रिएका नेपाल इन्स्योरेन्स कम्पनीका कर्मचारीमाथि कम्पनिका सीईओले उजुरी दिएपछि कर्मचारी र व्यवस्थापनबीच विवाद झन् चर्किएको छ । कम्पनिका सीईओ चन्द्रसिंह साउदले कर्मचारी आन्दोलन दबाउन खोजेको र कर्मचारीहरुलाई कार्यालयमै गाली गलौज गरेका कारण आफूहरु आन्दोलनमा उत्रिएको युनियनका उच्च पदाधिकारीले बताए । करारमा बसेका सिइओले अनियमित ढंगले कार्यकाल लम्ब्याएर बसेको र कर्मचारीका अधिकार कुण्ठित गर्न खोजेको युनियनको भनाइ छ । कार्यालयका कर्मचारीहरुलाई अनावश्यक गाली गर्ने र थर्काउने प्रवृतिले गर्दा कर्मचारीहरु शोषित हुन पुगेकाले आन्दोलनमा उत्रिएको कर्मचारी युनियन स्रोतले बतायो । स्रोतले भन्यो ‘कार्यालयमा छिर्नासाथ कर्मचारीलाई थर्काउन खोजे । महिला कर्मचारीमाथि दुरव्यवहार गरे । बिनाकारण कारवाही गर्न भन्दै कार्यालयकै पाँच कर्मचारीको नाम पुलिस प्रशासनमा सिफारिस गरे । त्यसैले हामी आन्दोलनमा उत्रिएका हौँ ।’ नेपाल बैंक लिमिटेडको प्रमुख लगानी र सक्रियतामा स्थापित कम्पनीमा बैंकको बहुमत सेयर छ ।
