बैंकिङ खबर । आन्तरिक राजश्व विभागले हकप्रद र बोनस सेयरमा अग्रिम कर असुल्न सम्बन्धित निकायहरुलाई निर्देशन दिएको छ । विभागले नेपाल धितोपत्र बोर्ड, नेपाल स्टक एक्सचेञ्ज र सिडिएस एण्ड क्लियरिङ लिमिटेडलाई पत्रचार गरी अग्रिम कर असुल्न निर्देशन दिएको हो ।
आन्तरिक राजश्व विभागको निर्देशन अनुसार आइतबारदेखि लगानीकर्ताको बोनस र हकप्रद सेयरको लागत मूल्य एक सय रुपैयाँ कायम भई सो अनुसार लाभकर गणना हुनेछ । असार ३२ गतेसम्म पाँच प्रतिशत र श्रावण १ गतेबाट नयाँ बजेटको व्यवस्था अनुसार लगानीकर्ताले ७.५ प्रतिशतका दरले पूँजीगत लाभकर तिर्नुपर्नेछ ।
विभागका अनुसार अब सेयर लगानीकर्ताले बोनस र हकप्रद सेयरको चुक्ता मुल्यलाई आधार मानेर लाभकर तिर्नुपर्ने भएको छ । यसअघि बोनस र हकप्रदमा आधारमूल्यको आधारमा लाभकर गणना हुँदै आएको थियो । नेप्सेमा हकप्रद र बोनस समायोजन हुँदा निर्धारण गरिएको कम्पनीको औषत आधारमूल्य भन्दा बढीमा सेयर बिक्री गर्दाको अवस्थामा आयको आधारमा पाँच प्रतिशतका पूँजीगत लाभकर तिर्दे आएका थिए ।
