नेपाल राष्ट्र बैंकले दशैँको विदाका दिनहरुमा पनि खुला रहन बैंक तथा वित्तीय संस्थाहरुलाई निर्देशन दिएको छ । बुधबार एक सूचना जारी गर्दै राष्ट्र बैंकले राजस्ववापत प्राप्त हुने चेक क्लियरिङका लागि बैंक तथा वित्तीय संस्था बन्द नगर्न भनेको हो ।
असोज १ गते अर्थ मन्त्रालयले राष्ट्र बैंकलाई पत्र पठाउँदै दशैँको सार्वजनिक विदाका दिन बैकिंङ कार्यालय खुला राख्ने व्यवस्था मिलाउन भनेको थियो । अर्थ मन्त्रालयले राजस्व संकलन गर्ने राष्ट्र बैंक लगायत सम्पूर्ण बैंक र राजस्वबाट प्राप्त हुने चेक क्लियरिङ गर्ने बैंकहरु र नेपाल क्लियरिङ हाउसलाई समेत कार्यालय खुला राख्ने व्यवस्था मिलाउन भन्दै राष्ट्र बैंकलाई पत्राचार गरेको थियो ।
दशैँका लागि असोज ५, ७, ११, १२, १५ र १६ गते सार्वजनिक विदा परेको छ । महिनाको अन्तिम दिन कुनै सार्वजनिक विदा परेमा पनि त्यस दिन बैंक तथा वित्तीय संस्था खुला राख्न राष्ट्र बैंकले निर्देशन दिएको छ ।
