नेपाल राष्ट्र बैंकले मुद्दति निक्षेपको रुपमा एक अर्ब ५२ करोड ६२ लाख रुपैयाँ लगानी गर्ने भएको छ । यसका लागि राष्ट्र बैंकले क, ख र ग वर्गका बैंक तथा वित्तीय संस्थासँग प्रस्ताव माग गरेको छ । राष्ट्र बैंकले विभिन्न कोषमा भएको उक्त रकम एक वर्ष (आगामी असोज १ गतेदेखि २०७५ भदौं ३१ गतेसम्म)का लागि उक्त रकम लगानी गर्न लागेको हो ।
राष्ट्र बैंकले लगानी गर्न लागेको कुल रकममध्ये एक अर्ब २२ करोड १० लाख रुपैयाँका लागि वाणिज्य बैंकको प्रस्ताव माग गरिएको छ भने विकास बैंकका लागि २२ करोड ८९ लाख रुपैयाँ छुट्याइएको छ । बाँकी सात करोड ६३ लाख रुपैयाँ राष्ट्र बैंकले फाइनान्स कम्पनीहरुका लागि छुट्याएको छ ।
सो रकम लिन ईच्छुक बैंक तथा वित्तीय संस्थाले आउने सोमबारसम्म प्रस्ताव पेश गर्नुपर्नेछ । बैंक तथा वित्तीय संस्था सञ्चालनमा आएको कम्तीमा २ बर्ष पुरा गरेको, बैंकबाट तोकिएको न्यूनतम पूँजीकोष कायम रहेको, निष्कृय कर्जा (एनपीए) कुल कर्जा सापटको ५ प्रतिशत भन्दा कम भएको, खुद तरल सम्पत्ति स्वदेशी निक्षेपको कम्तीमा २० प्रतिशत वा सो भन्दा बढी रहेका बैंक तथा वित्तीय संस्थाले मात्र प्रस्ताव गर्न पाउने राष्ट्र बैंकले जनाएको छ । यस्तै शिघ्र सुधारत्मक कारबाही फुकुवा भएको ६ महिना पुगेका संस्थाहरुले समेत आवेदन दिन पाउनेछन् ।
