गत साता बेलायतको अक्सफोर्ड अन्तर्गतको यूरोप विजनेश एसेम्बली (इबीए)को उत्कृष्ट म्यानेजर अवार्ड पाएका प्राइम कमर्सियल बैंकका कार्यकारी अधिकृत नारायणदास मानन्धर पुरस्कार लिन नजाने विचारमा थिए । ‘म त्यतिप्रचार–प्रसार हुन चाहान्नँ ।’उनले भने ‘यो पुरस्कार महत्वपूर्ण थियो । तर पनि मैले त्यहाँ जाने मन गरिनँ ।’ सोमबार बैंकिङ खबरसँग कुरा गर्दैै मानन्धरले भने ‘मैले उबेलापनि राजाले दिएको पुरस्कार लिएको थिइनँ ।’ तर सबैको जोडबल र बैँकले पनि उत्कृष्ट बैँक अवार्ड पाएकाले उनले लन्डन पुगेर अवार्ड थापे । यद्यपी उनले कुनै भिन्दै आसयका त्यस्तो विचार नगरेको स्पष्ट पारे । झण्डै एक साताअघि खबर आएको भएपनि उनले अन्तिममा जाने निर्णय गरे ।
बेलायतको अक्फोर्डअन्तर्गत यो वर्षको एशिया प्रशान्त क्षेत्रको उत्कृष्ट बैंकको अवार्ड प्राइम कमर्सियल बैँकले पायो भने बैंकका प्रमुख कार्यकारी अधिकृत नारायणदास मानन्धरलाई उत्कृष्ट बैंक तथा उत्कृष्ट म्यानेजर अवार्ड प्रदान गरियो । चैत १२ गते कार्यक्रमबीच बैंकलाई बेलायतको इबीएले २०१६ को प्रेस्टिजिएस इन्टरनेशनल अवार्ड प्रदान गरेको हो ।
अक्सफोर्ड अन्तर्गत सन् २००० मा स्थापना भएको यूरोप विजनेश एसेम्ब्लीले समाजलाई आर्थिक, बैज्ञानिक, सामाजिक र सास्कृतिक रुपमा विकास गर्न सहयोग पुर्याउने संस्थालाई उक्त अवार्ड दिँदै आएको छ । खासगरी इबीएले राजनीतिज्ञ, उद्योगी, व्यवसायी, बैज्ञानिक र कलाकारलाई यस्तो अवार्ड दिने गरेको छ । इबीकाअनुसार प्राइमबैंकले उत्कृष्ट व्यवस्थापन, कर्मचारीलाई राम्रो सेवा सुविधा तथा सेवाग्राहीलाई राम्रो सेवा प्रदान गरे वापत उक्त अवार्ड प्रदान गरिएको हो ।
प्राइम कमर्शियल बैंक नेपालको उत्कृष्ट १० बैंकको सूचीभित्र रहेको छ । बैंकले जलविद्युत, सिमेन्ट उद्योग लगायतका क्षेत्रमा लगानी गर्दै आएको छ । स्थापनाकालदेखि नै लगानीकर्तालाई उच्च प्रतिफल दिँदै आएको बैंक गत आर्थिक वर्षमा न्यून संचालन खर्च गरी अधिकतम नाफा कमाउने बैंकहरुको सूचीको दशौँ नम्बरमा थियो । बैंकले चालू आवको दोस्रो चौमासमा पनि ४६ करोड ९२ लाख रुपैयाँ मुनाफा आर्जन गरेको छ । हाल बैंकको चुक्ता पूँजी ३ अर्ब ७० करोड ९२ लाख रुपैयाँ रहेको छ भने जगेडा कोषमा १ अर्ब ९ करोड रुपैयाँ रहेको छ । बैंकले चालू आवको दोस्रो चौमाससम्ममा कुल ४२ अर्ब ३० करोड रुपैयाँ निक्षेप संकलन गरी ३४ अर्ब ११ करोड कर्जा प्रवाह गरेको छ ।
बैंकका कार्यकारी अधिकृत मानन्धरले राम्रो र प्रभावकारी काम गरेबापत अवार्ड पाएको बताए । आगामी दिनमा कर्मचारी, लगानीकर्ता र मुलुकको अर्थतन्त्रलाई राम्रो टेवा पुग्नेगरी काम गर्ने उनले जनाए ।
