बैंकिङ खबर / कुमारी बैंकले गत आर्थिक वर्ष २०८२/८३ मा आफ्नो वित्तीय अवस्थामा उल्लेख्य सुधार गरेको छ। बैंकको अपरिष्कृत वित्तीय विवरणअनुसार गत आवमा बैंकले ७ अर्ब ३८ करोड ७१ लाख रुपैयाँ खुद नाफा कमाएको छ। यो अघिल्लो आर्थिक वर्षको तुलनामा ३०६ प्रतिशतले बढी हो।अघिल्लो आर्थिक वर्ष २०८१/८२ मा बैंकको खुद नाफा १ अर्ब ८१ करोड ९६ लाख रुपैयाँ रहेको थियो। एनसीसी बैंकसँगको मर्जरपछि निरन्तर सञ्चित नोक्सानीमा रहेको बैंकले तीन वर्षसम्म सेयरधनीलाई लाभांश वितरण गर्न सकेको थिएन। तर, गत आवको नाफासँगै बैंक सञ्चित नोक्सानीबाट बाहिर निस्कँदै लाभांश वितरण गर्न सक्ने अवस्थामा पुगेको छ ।
बैंकको नाफा वृद्धिमा खुद ब्याज आम्दानी, शुल्क तथा कमिसन आम्दानी र अघिल्लो अवधिमा कायम गरिएको कर्जा नोक्सानी व्यवस्थाको राइटब्याकले मुख्य योगदान गरेको देखिन्छ।गत आवमा बैंकको खुद ब्याज आम्दानी ३.३७ प्रतिशतले बढेर १२ अर्ब १ करोड ३० लाख रुपैयाँ पुगेको छ। अघिल्लो आवमा यस्तो आम्दानी ११ अर्ब ६२ करोड १५ लाख रुपैयाँ थियो। त्यसैगरी, शुल्क तथा कमिसनबाट हुने आम्दानी १४.५५ प्रतिशतले बढेर ३ अर्ब ४ करोड ८८ लाख रुपैयाँ पुगेको छ।बैंकले विगतमा सम्भावित कर्जा नोक्सानीका लागि छुट्याएको रकममध्ये १ अर्ब ४३ करोड ९९ लाख रुपैयाँ राइटब्याक गरेको छ। अघिल्लो आवमा भने बैंकले कर्जा नोक्सानी व्यवस्थापनका लागि करिब ३ अर्ब ४५ करोड रुपैयाँ खर्च गरेको थियो। प्रोभिजनिङ खर्च घट्नु र राइटब्याक हुनु बैंकको नाफा वृद्धिको प्रमुख आधार बनेको देखिन्छ ।
यस अवधिमा बैंकको कर्मचारी खर्च भने बढेको छ। कर्मचारी खर्च १३.४८ प्रतिशतले वृद्धि भएर ४ अर्ब ८९ करोड २० लाख ९८ हजार रुपैयाँ पुगेको छ। अघिल्लो आवमा यस्तो खर्च ४ अर्ब ३१ करोड १० लाख रुपैयाँ थियो। यता, अन्य सञ्चालन खर्च भने ४.६४ प्रतिशतले घटेर १ अर्ब २ करोड ७४ लाख रुपैयाँमा सीमित भएको छ ।
निक्षेप र कर्जा विस्तारमा पनि वृद्धि
गत आवमा कुमारी बैंकको निक्षेप संकलन र कर्जा प्रवाह दुवै बढेको छ। बैंकको कुल निक्षेप १०.४५ प्रतिशतले वृद्धि भई ४ खर्ब २ अर्ब ७३ करोड रुपैयाँ पुगेको छ।त्यस्तै, बैंकले प्रवाह गरेको कुल कर्जा ४.०७ प्रतिशतले बढेर २ खर्ब ७० अर्ब ९२ करोड रुपैयाँ पुगेको छ। निक्षेप र कर्जा दुवैमा भएको वृद्धिले बैंकको व्यवसाय विस्तारमा सामान्य सुधार भएको देखाउँछ ।
सञ्चित नोक्सानीबाट बाहिरिँदै लाभांशको बाटो खुला
बैंकका सेयरधनीका लागि सबैभन्दा महत्वपूर्ण सुधार वितरणयोग्य नाफामा देखिएको छ। अघिल्लो आवको अन्त्यमा बैंक ३ अर्ब ८४ करोड ९५ लाख रुपैयाँ सञ्चित नोक्सानीमा थियो।गत आवमा भएको उल्लेख्य नाफापछि बैंकले उक्त सञ्चित नोक्सानी पूर्ति गर्दै ७९ करोड १७ लाख रुपैयाँ वितरणयोग्य नाफा कायम गरेको छ। यस आधारमा बैंकले करिब ३.०२ प्रतिशतसम्म लाभांश वितरण गर्न सक्ने क्षमता बनाएको देखिन्छ। यद्यपि, वास्तविक लाभांश वितरण भने नियामकीय व्यवस्था र बैंकको आगामी निर्णयमा निर्भर हुनेछ ।
प्रतिसेयर आम्दानीमा उल्लेख्य सुधार
बैंकको नाफा बढेसँगै प्रतिसेयर आम्दानी (EPS) मा पनि उल्लेख्य सुधार भएको छ। अघिल्लो आवमा ६.९४ रुपैयाँ रहेको EPS गत आवमा बढेर २८.१७ रुपैयाँ पुगेको छ।बैंकको प्रतिसेयर नेटवर्थ १७०.८० रुपैयाँ रहेको छ भने मूल्य–आम्दानी अनुपात (P/E Ratio) ७.४५ गुणा रहेको छ।त्यसैगरी, बैंकको पुँजी पर्याप्तता अनुपात १२.३१ प्रतिशतबाट बढेर १३.५५ प्रतिशत पुगेको छ। प्राथमिक पुँजीकोष अनुपात पनि ८.५१ प्रतिशतबाट बढेर ९.९२ प्रतिशत पुगेको छ ।
खराब कर्जा अझै चुनौती
वित्तीय सूचकमा सुधार भए पनि बैंकको खराब कर्जा भने अझै चुनौतीकै रूपमा देखिएको छ। बैंकको निष्क्रिय कर्जा अनुपात अघिल्लो आवको ६.९५ प्रतिशतबाट बढेर ७.४६ प्रतिशत पुगेको छ।तर, निष्क्रिय कर्जाविरुद्धको प्रोभिजन कभरेज अनुपात १११.७५ प्रतिशत रहेको छ। बैंकको खुद निष्क्रिय कर्जा अनुपात भने १.९४ प्रतिशतमा रहेको छ।बैंकले ब्याज असुलीमा देखिएको समस्याका कारण ३६ अर्ब ४२ करोड रुपैयाँ नियामकीय जगेडा कोषमा छुट्याएको छ। गैरबैंकिङ सम्पत्ति बिक्रीबाट करिब १४ करोड रुपैयाँ भने नियामकीय जगेडाबाट फिर्ता भएको छ।बैंकको आधार दर ५.०८ प्रतिशत रहेको छ। त्यस्तै, स्प्रेड दर अघिल्लो अवधिको ३.५९ प्रतिशतबाट घटेर ३.११ प्रतिशतमा आएको छ ।
समग्रमा, कुमारी बैंकले गत आर्थिक वर्षमा आम्दानी विस्तार, कर्जा नोक्सानी व्यवस्थापनमा सुधार र राइटब्याकका कारण नाफामा ठूलो फड्को मारेको देखिन्छ। यद्यपि, निष्क्रिय कर्जाको उच्च स्तर बैंकका लागि आगामी दिनमा व्यवस्थापन गर्नुपर्ने प्रमुख चुनौतीका रूपमा रहेको छ। सञ्चित नोक्सानीबाट बाहिरिँदै वितरणयोग्य नाफा सकारात्मक अवस्थामा पुगेकाले भने बैंकका सेयरधनीका लागि लाभांशको सम्भावना पुनः खुलेको छ ।
