बैंकिङ खबर/ दोस्रो बजारमा गत भदौ महिनामा छ वटा अलग अलग कम्पनीको शेयर सूचीकृत भएको छ ।सूचीकृत भएका कम्पनीहरुमा तीन वटा कम्पनीको बोनस शेयर छ भने दुई वटाको हकप्रद र एउटाको एफपीओ छ ।
नेपाल स्टक एक्सचेन्ज (नेप्से) का अनुसार मैलुङ खोला जलविद्युत् कम्पनी, सीईडीबी हाइड्रोपावर कम्पनी, नेपाल पुनर्बीमा कम्पनीको बोनस शेयर, सूर्योदय वोमी लघुवित्त वित्तीय संस्थाको एफपीओ,हाइड्रोइलेक्ट्रीसिटी इन्भेष्टमेन्ट एण्ड डेभलपमेन्ट र बेष्ट फाइनान्सको हकप्रद शेयर सूचीकृत भएको हो ।
जसअनुसार मैलुङ खोला जलविद्युत् कम्पनीको ८१ हजार ७६८.२४ कित्ता, सीईडीबी हाइड्रोपावरको ९ लाख २३ हजार ३५१ कित्ता र नेपाल पुनर्बीमा कम्पनीको ६० लाख ८६ हजार ४३३.२८ कित्ता बोनस शेयर सूचीकृत भएको छ ।
नेप्सेका अनुसार सूर्योदय वोमी लघुवित्तको ४६ हजार ७२९.५५ कित्ता एफपीओ सूचीकृत भएको छ । यसैगरी, सोही अवधिमा हाइड्रोइलेक्ट्रीसिटी इन्भेष्टमेन्ट एण्ड डेभलपमेन्ट कम्पनीको १ करोड ६८ लाख ५९ हजार ५० कित्ता र बेष्ट फाइनान्सको ३ लाख ५६ हजार ७४.५७ कित्ता हकप्रद शेयर सूचीकृत भएको छ ।
