बैंकिङ खबर\ हिमालयन एभरेष्ट इन्स्योरेन्स कम्पनीका प्रमुख कार्यकारी अधिकृत बिजय बहादुर शाह बर्खास्त भएका छन् । कम्पनीको सञ्चालक समितिको बैठकले भोलि असार १३ गतेदेखि लागू हुने गरी सिईओ शाहलाई बर्खास्त गरेको हो ।
सञ्चालक समितिको बैठकमा सामान्य विवाद उत्पन्न भएपछि बैठक नै छोडेर हिँडेका थिए । सञ्चालक समितिको बैठकमा अपमान गर्दै बैठक नै छोडेको भन्दै सञ्चालक समिति सिइओ शाहप्रति असन्तुष्ट भएको थियो ।
नेपाल इन्स्योरेन्स हुँदै हिमालयन जनरल इन्स्योरेन्स कम्पनीमा सिइओ बनेका शाह मर्जरपछि एकीकृत कम्पनीको सिइओ बनेका थिए । अध्यक्ष महेन्द्रकृष्ण श्रेष्ठले सिइओ शाहलाई बर्खास्त गरिएको पत्र इमेलमार्फत पठाएका छन् । सिइओ शाहको पदावधी करिब दुई वर्ष बाँकी थियो ।
यस्तै उक्त कम्पनीको कामु सिइओको जिम्मेवारी अञ्जु श्रेष्ठलाई दिइएको छ । लामो समयदेखि निर्जीवन बीमा क्षेत्रमा योगदान पुर्याएकी श्रेष्ठ हिमालयन एभरेष्ट इन्स्योरेन्स कम्पनीमा लामो समयदेखि विभिन्न पद हुँदै पुनर्बीमा काम गर्दै आएकी थिइन् ।
हिमालयन एभरेष्ट इन्स्योरेन्स कम्पनीको सञ्चालक समितिको बैठकले आजदेखि लागू हुने गरी डेपुटी सिइओ श्रेष्ठलाई कामु सिइओको जिम्मेवारी तोकेको हो ।
