श्रम सहकारीको अवधारणाले मिनी ठेकेदार जन्माउँछ : डा. खतिवडा


Bankingkhabar /June 19, 2022

बैंकिङ खबर/ पूर्वअर्थमन्त्री डा. युवराज खतिवडाले श्रम सहकारीको प्रावधानले मिनी ठेकेदार जन्माउने बताउनुभएको छ । श्रम सहकारीको अवधारणा ठेकेदार प्रवृत्तिमा आएकोले यो अभियान विपरित हुने उहाँको भनाइ छ ।

बजेटले श्रम सहकारीमार्फत १० करोड सम्मको ठेक्का लिन पाउने व्यवस्थाले सहकारी अभियानलाई नै पछि धकेल्न सक्ने संकेत उहाँले गर्नुभयो । सहकारीले सदस्यबीच सहकार्य गरी उनीहरुकै आर्थिक, सामाजिक उत्थानका लागि काम गर्ने भन्दै उहाँले भन्नुभयो, ‘सदस्यले ज्यालामा काम गर्दैन श्रमको माध्यमबाट आर्थिक स्तर माथि उकास्छन् । तर श्रम, ज्याला र ठेक्कामा काम गर्ने सहकारी कस्तो हुन्छन् ? उहाँले प्रश्न गर्नुभयो, ‘त्यस्ता संस्था मिनी ठेकेदार मात्रै हुन् ।’

जिल्ला सहकारी संघ, काभ्रेपलाञ्चोकको आयोजनामा सुरु भएको व्यवस्थापन प्रमुखहरुको जिल्ला स्तरीय गोष्ठीलाई सम्बोधन गर्दै उहाँले सो कुरा बताउनुभएको हो । कार्यक्रमका प्रमुख अतिथि समेत रहेका खतिवडाले श्रमिक वर्ग एकआपसमा मिलेर पूँजी निर्माण गरी आयआर्जनको काम गरे मात्र त्यो श्रम सहकारी हुने बताउनुभयो ।

यसका लागि अरु कुनै नाम दिइराख्न नपर्ने उहाँले बताउनुभयो । सहकारीले शिक्षा, स्वास्थ्य लगायतका क्षेत्रमा काम गर्न सकिने उहाँको भनाइ छ । स्वास्थ्य सहकारीले समुदायसँग सहकार्य गरेर आधारभुत स्वास्थ्य सेवा र शिक्षा सहकारीले शिक्षाको व्यापारिकरणलाई न्युनिकरण गर्न कम मुनाफामा काम गर्न सके त्योभन्दा उत्तम केही नहुने उहाँले बताउनुभयो । वर्तमान तरलता संकटको समस्या तत्काल समाधान नहुने उहाँले उल्लेख गर्नुभयो ।

अस्वभाविक क्षेत्रमा लगानी बढेको हुँदा तरलता समस्या आएको भन्दै उहाँले त्यसलाई रोक्नुपर्ने बताउनुभयो । उहाँले पूँजीगत पलायन, हुण्डी कारोबार एवं व्यापारमा हुने विचलनलाई रोक्न नसके तरलता समस्या हल नहुने बताउनुभयो । अहिले प्रणालीमा नै समस्या रहेकाले बैंक, वित्त र सहकारी संस्थामा एउटै समस्या आएको छ । उहाँले भन्नुभयो, ‘कोरोनालाई मात्र जोडेर तरलता समस्याको विश्लेषण गर्न नमिल्ने भन्दै विवेकपूर्ण तरिकाले लगानी नगर्दा समस्या आएको हो ।’ ‘चुनौतिपछि नयाँ सामान्य अवस्था अँगाल्दै सहकारी’ भन्ने नारासहित सुरु भएको गोष्ठीमा जिल्लाका १२९ जना व्यवस्थापन प्रमुख तथा अधिकृतहरुको उपस्थिति रहेको संघका सिइओ ज्ञानेन्द्र दहालले बताउनुभयो ।

कार्यक्रममा उहाँले काभ्रेको सहकारी अभियान र थिमका बारेमा प्रस्तुतिकरण गर्नुभएको थियो । दुई दिने गोष्ठीको पहिलो दिनमा प्रभावकारी वित्तीय संरचनाको विषयमा विषय विज्ञ कुवेर निरौलाले प्रस्तुतिकरण गर्ने, राष्टिय अर्थतन्त्र निर्माणमा सहकारीको भूमिका विषयमा डा. देवराज रोकाले, प्रभावकारी ऋण असुली विषयमा प्रकाश पोखरेलले र सहकारीमा मोबाइल बैंकिङ विषयमा सन्जय महासेठले प्रस्तुति गर्ने तालिका रहेको छ ।

जिल्ला सहकारी संघ, काभ्रेका अध्यक्ष दिलिप शर्माको अध्यक्षतामा भएको कार्यक्रममा राष्ट्रिय सहकारी महासंघका सञ्चाल कडि.बी. बस्नेत, नेफ्स्कुनका अध्यक्ष परितोष पौड्याल, राष्टिय सहकारी बैंकका सञ्चालक ज्ञानबहादुर तामाङ, बागमती प्रदेश सहकारी संघका अध्यक्ष रामशरण घिमिरे, बागमति प्रोस्कुनका अध्यक्ष उद्धव सापकोटा, जिल्ला सहकारी संघ, काभ्रेका सल्लाहकारहरु टिकाबल्लभ सापकोटा, विनोद पराजुली, मुकुन्दप्रसाद दाहाल, काभ्रेपलाञ्चोक जिल्ला बचत तथा ऋण सहकारी संघ लि.का अध्यक्ष जितेन्द्र नकर्मी, जिल्ला बहुउद्देश्यीय सहकारी संघ, काभ्रेका अध्यक्ष विधान जोशी लगायतले शुभकामना मन्तव्य राख्नुभएको थियो ।

Spread the love

सोसिअल मेडिया