बैंकिङ खबर/ म्याद सकिएको डेबिट कार्ड प्रयोग गरी सिद्धार्थ बैंकको एटीएम मेशिनबाट पैसा निकाल्ने दुई जना पक्राउ परेका छन् ।
पैसा निकाल्दै गरेको सूचना पाएपछि खटिएको प्रहरीले काठमाडौं भत्केको पुल नजिकैबाट उनीहरुलाई पक्राउ गरेको हो । पक्राउ पर्नेमा सोलुखुम्बु घर भएका जगतबहादुर गुरुङ र पर्साकी सावित्री गुरुङ रहेका छन् । उनीहरूको साथबाट एटीएम कार्ड र २१ लाख रुपैयाँ पनि बरामद गरिएको प्रहरी परिसर टेकुले जनाएको छ ।
उनीहरूले म्याद सकिएको ल्वयड्स बैंक लन्डनको भिसा डेबिट कार्डको प्रयोग गरेर चावहिल, कालोपुल र हात्तीसारबाट ३४ लाख ३५ हजार रुपैयाँ निकालेको अनुसन्धानबाट खुलेको छ । यसरी निकालेको रकममध्ये १० लाख रुपैयाँ सहकारीमा राखेको पनि प्रहरीले जनाएको छ ।
