बुधबार सेयर बजारमा २ अर्ब ६५ करोड ६१ लाख रुपैयाँबराबरको कारोबार भएको छ । करिब साढे ३४ हजार कारोबारबाट १ सय ८६ कम्पनीका ५८ लाख ८२ हजार कित्ता सेयर किनबेच भए ।
अघिल्लो दिनको तुलनामा नेप्से परिसूचक र कारोबार रकम दुवै बढी हो । मंगलबार बजारमा १ अर्ब ८५ करोड ५१ लाख रुपैयाँबराबरको सेयर कारोबार भएको थियो । यो साता सबै दिन नेप्से परिसूचक उकालो लागेको छ ।
बुधबार व्यापार र जीवन बिमाबाहेक सबै समूहका परिसूचक बढेका छन् । तीमध्ये बैंकिङ, विकास बैंक, जलविद्युत्, लघुवित्त र सामूहिक लगानी कोष उपसमूहका परिसूचक एक प्रतिशतभन्दा धेरैले बढेका छन् । नेप्से परिसूचक बढेपछि सेयर बजारको आकार कुल बजार पुँजीकरण पनि १९ खर्ब २९ अर्ब रुपैयाँ कायम भएको छ ।
यही क्रममा नेप्सेले अनलाइनबाट ग्राहक परिचयपत्र (केवाईसी) अद्यावधिक गर्न, अनलाइन कारोबारका लागि युजर नेम र पासवर्ड लिन सुविधा दिएको छ । ‘कोभिड–१९ महामारीलाई दृष्टिगत गर्दै भौतिक दूरी कायम राखी दोस्रो बजार कारोबार गर्न/गराउन नेप्सेले अनलाइन कारोबारलाई थप सहज बनाउने तथा नेप्से तथा सदस्य दलाल व्यवसायीलाई प्रदान गर्दै आइरहेको छ,’ नेप्सेले जारी गरेको विज्ञप्तिमा भनिएको छ, ‘यही क्रममा लगानीकर्ताले अनलाइन कारोबार गर्नका लागि युजरनेम र पासवर्ड लिने तथा ग्राहक पहिचान विवरण (केवाईसी) लाई अद्यावधिक गर्न सम्पूर्ण सदस्य दलालहरूको टीएमएस लिंकमा अनलाइन रजिस्ट्रेसन सुविधा उपलब्ध गराइएको छ ।’
उक्त लिंकमा गई रजिस्टर लेखिएको ठाउँमा क्लिक गरेपछि आफ्नो विवरण भरेर युजरनेम तथा पासवर्ड लिन तथा केवाईसी अद्यावधिक गर्न/गराउन नेप्सेले सबैलाई आग्रह गरेको छ । यसबाट बढीभन्दा बढी प्रयोगकर्ता अनलाइन कारोबारमा सहभागी हुन सक्ने नेप्सेको अपेक्षा छ ।
कान्तिपुर दैनिकमा प्रकाशित समाचार ।
