बैंकिङ खबर । नेपाल राष्ट्र बैंकले बैंकिङ क्षेत्रलाई संघिय प्रणालीमा लैजाने भन्दै क्षेत्रिय स्तरका विकास बैंक तथा वित्त कम्पनीलाई प्रदेश स्तर अथवा राष्ट्रिय स्तरको कार्यक्षेत्र रोज्नको लागि निर्देशन दिएको थियो । उक्त निर्देशन अनुसार क्षेत्रिय स्तरका विकास बैंकहरुले २०७७ असार मसान्त भित्रमा प्रदेश स्तरको हुनको लागि १ अर्ब २० करोड र राष्ट्रिय स्तरको बन्नको लागि राष्ट्र बैंकको पूँजी वृद्धि योजना अनुरुप २ अर्ब ५० करोड रुपैयाँ चुक्ता पूँजी पुर्याउनुपर्ने हुन्छ । राष्ट्र बैंकको बैंकहरुलाई संघिय संरचनामा लैजाने नीतिसँगै क्षेत्रिय स्तरको विकास बैंकमा मर्जरको लहर सुरु भएको छ ।
त्यसै अनुरुप दुई वटा विकास बैंक मिलेर प्रदेश स्तरको विकास बैंक बन्ने उदेश्य अनुरुप बुटवलमा केन्द्रिय कार्यालय रहेका तिन जिल्ला कार्यक्षेत्र भएका २ विकास बैंकहरु तिनाउ विकास बैंक र मिसन डेभलपमन बैंक विच आइतबार मर्जरमा जाने सम्झौता भएको छ । मर्जर पछाडी बैंकको नाम तिनाउ मिसन डेभलपमेन्ट बैंंक रहने छ भने केन्द्रिय कार्यालय तिनाउ विकास बैंकको केन्द्रिय कार्यालय नै रहने सम्झौतामा उल्लेख छ । बैंकहरुको शेयर स्वाप रेपियो १ः१ रहने र मर्जर पश्चात राष्ट्रिय स्तरको बैंक बन्ने लक्ष लिएका सम्झौता पश्चात जारी गरेको विज्ञप्तिमा उल्लेख छ । त्यसको लागि थप मर्जर तथा हकप्रद जारी गर्ने सहमति भएको विज्ञप्तिमा जनाइएको छ ।
मर्जर पश्चात बन्ने बैंकको चुक्ता पूँजी १ अर्व १४ करोड ४१ लाख रुपैयाँ पुग्ने छ । त्यस्तै निक्षेप संकलन १० अर्व १२ करोड रुपैयाँ तथा कर्जा कर्जा लगानी ८ अर्व ८३ करोड रुपैयाँ पुग्नेछ । मर्ज पछि बन्ने बैंकको शाखा संख्या ३७ वटा पुग्नेछन् । मर्जर पछि बैंकले नयाँ कार्यक्षेत्र थप भएका पाल्पा र दाङ्ग जिल्लामा समेत शाखा विस्तार गर्ने विज्ञप्तिमा उल्लेख छ ।
मर्जर पछि बैंकको संचालक समिति अध्यक्षमा मिसन डेभलपमेण्ट बैंकका अध्यक्ष टिकाराम घिमिरे रहने छन् । त्यस्तै प्रमुख कार्यकारी अधिकृतमा तिनाउ विकास बैंकबाट प्रदिप कुमार श्रेष्ठ र नायव प्रमुख कार्यकारी अधिकृतमा मिसन डेभलपमेण्ट बैैंकबाट हरि प्रसाद घिमिरे रहने बताइएको छ ।
