पूँजी बजार घट्दै जाँदा त्यसको असर म्युचुअल फण्डहरूको खुद सम्पत्ति मूल्य (एनएभी)मा परेको माघ मसान्तको विवरणले देखाएको छ । म्युचुअल फण्डहरूले शेयरमा लगानी गर्ने भएकोले शेयर बजारमा आउने उतारचढावले प्रत्यक्ष असर पार्ने गर्छ । शेयर बजार घट्दा म्युचुअल फण्डको एनएभी पनि घट्ने गरेको छ भने बजार बढ्दा यिनीहरूको एनएभीसमेत बढ्ने गरेको छ ।
विगत केही महीनादेखि बजार घटिरहँदा म्युचुअल फण्डहरूले पनि शेयरमा लगानी घटाएको प्रकाशित विवरणमा देखिन्छ । योजनाले सार्वजनिक गरेका खुद वित्तीय विवरणअनुसार माघ मसान्तमा ११ ओटा योजनाको एनएभी घटेको छ भने सानिमा इक्विटीको स्थिर छ । गत पुस मसान्तको तुलनामा माघ मसान्तमा यी फण्डको एनएभी ३ दशमलव २८ अङ्क घटेको हो । गत मसान्तमा रू. १ सय ३७ दशमलव २९ रहेको एनएभी माघ मसान्तमा घटेर रू. १ सय ३४ दशलमव शून्य १ मा आइपुगेको छ ।
सूचीकृत धितोपत्र लगानीमा तीन योजनाको मात्र लगानी बढेको देखिन्छ भने ९ योजनाको लगानी घटेको छ । साना लगानीकर्ताका लागि उपयुक्त मानिने म्युचुअल फण्डहरूले माघ मसान्तमा धितोपत्रमा रू. ५ अर्ब ८५ करोड ८६ लाख २८ हजार लगानी गरेका छन् । पुस मसान्तमा यी योजनाले धितोपत्रमा रू. ६ अर्ब २६ लाख ७८ हजार लगानी गरेका थिए । यो गत मसान्तको तुलनामा १४ करोड ४० लाख ५० हजार कम हो । सानिमा इक्विटी फण्डले सूचीकृत धितोपत्रमा गत आवको तुलनामा रू. ६ करोड ५१ लाख लगानी बढाएको छ ।
१२ म्युचुअल फण्डहरूमध्ये नबिल ब्यालेन्स फण्डको माघ मसान्तमा एनएभी रू. १८ दशमलव शून्य ३ छ । यो गत आवको तुलनामा रू. शून्य दशमलव ३३ कम हो । पुस मसान्तको तुलनामा एनआईबीएल प्रगति फण्डको एनएभी सबैभन्दा बढी रू. शून्य दशमलव ४३ प्रतिशल घट्न पुगेको छ । यस योजनाको एनएभी पुस मसान्तमा रू. ९ दशमलव १६ थियो भने माघ मसान्तमा रू. ८ दशमलव ७३ छ ।
शेयरमा सबैभन्दा बढी लगानी एनआईबीएल समृद्धि फण्डले गरेको छ । यस फण्डले माघ मसान्तमा रू. ८५ करोड ६८ लाख शेयरमा लगानी गरेको छ । योजनाले पुस मसान्तमा रू. ८९ करोड ३६ लाख शेयरमा लगानी गरेको थियो । यो गत मसान्तको तुलनामा रू. ३ करोड ६७ कम हो । योजनाले सूचीकृत सार्वजनिक निष्कासन, हकप्रद र बोनस शेयरमा लगानी गरेका हुन् । आर्थिक अभियानमा प्रकाशित समाचार
