आर्थिक वर्ष ०७३(७४ मा लघुवित्त बैंकहरूको खुद नाफा ४१ दशमलव ५९ प्रतिशत बढेको छ । नेप्सेमा सूचीकृत १० कम्पनीहरूले सो अवधिसम्ममा प्रकाशित गरेको अपरिष्कृत वित्तीय विवरणका अनुसार लघुवित्तको मुनाफा यस्तो देखिएको हो ।
गत आवमा ४९ करोड ८० लाख रुपैयाँ लघुवित्तले मुनाफा आर्जन गरेको छ । यो सोही अवधिको अघिल्लो आवभन्दा झन्डै १५ करोड रुपैयाँ बढी हो । आव ०७२(७३ मा १० कम्पनीहरूले ३५ करोड १७ लाख रुपैयाँ नाफा आर्जन गरेको थियो । रकमका आधारमा सो अवधिसम्ममा सबैभन्दा धेरै लक्ष्मी लघुवित्तले १० करोड ७१ लाख रुपैयाँ खुद नाफा आर्जन गरेको छ । त्यस्तै सबैभन्दा धेरै नाफा वृद्धि नेसनल माइक्रोफाइनान्सले गरेको छ ।
अघिल्लो आर्थिक वर्षको तुलनामा कम्पनीको खुद नाफा ७६ दशमलव ५० प्रतिशत बढेको छ । सो अवधिमा कम्पनीले ७ करोड २१ लाख रुपैयाँ खुद नाफा आर्जन गरेको छ । रिलायबल माइक्रोफाइनान्सको नाफा भने सो अवधिमा घटेको छ । अघिल्लो आर्थिक वर्षमा १ करोड ८८ लाख रुपैयाँ नाफा आर्जन गरेको कम्पनीले गत आवको सोही अवधिमा १ करोड १२ लाख रुपैयाँ आर्जन गरेको छ । यो अघिल्लो आवको तुलनामा ४० प्रतिशत कम हो ।
व्यवसाय ४७ प्रतिशत बढ्यो
१० कम्पनीहरूले गत आवमा ४७ दशमलव ११ प्रतिशत व्यवसाय बढाएका छन् । सो अवधिमा कम्पनीहरूले आर्जन गरेको खुद ब्याज आम्दानीका आधारमा यस्तो देखिएको हो । आर्थिक वर्ष ०७२÷७३ मा ८४ करोड ७६ लाख रुपैयाँ कुल खुद ब्याज आम्दानी थियो । गत आवको सोही अवधिमा कुल १ अर्ब २४ करोड रुपैयाँ ब्याज आम्दानी गरेका छन् । सबैभन्दा धेरै ब्याज आम्दानी गर्ने लक्ष्मी लघुवित्त रहेको छ । कम्पनीले सो अवधिमा २४ करोड ५४ लाख रुपैयाँ खुद ब्याज आम्दानी गरेका छन् । स्वदेशी लघुवित्तको ब्याज आम्दानी भने सबैभन्दा धेरै ७४ दशमलव १५ प्रतिशत बढेको छ ।
सञ्चालन मुनाफा ४१ प्रतिशत बढ्यो
आव ०७३(७४ को असार मसान्तसम्ममा यी लघुवित्त कम्पनीहरूको सञ्चालन मुनाफा ४० दशमलव ९९ प्रतिशत बढेको छ । अघिल्लो आवको सोही अवधिमा ५२ करोड ९५ लाख रुपैयाँ रहेको लघुवित्तको कुल सञ्चालन मुनाफा गत आवमा २१ करोड ७१ लाख रुपैयाँ बढेर ७४ करोड ६७ लाख रुपैयाँ पुगेको छ । सो अवधिमा सबैभन्दा धेरै सञ्चालन मुनाफा लक्ष्मी लघुवित्तले पाएको छ । त्यस्तै रिलायबल माइक्रोफाइनान्सको सञ्चालन मुनाफा ४० प्रतिशत घटेको छ । नयाँ पत्रिका दैनिकमा प्रकाशित समाचार
