बैंकिङ खबर / नेपाल राष्ट्र बैंकले विभिन्न पदमा ६१ जना कर्मचारी भर्नाका लागि दरखास्त आह्वान गरेको छ। केन्द्रीय बैंकको मानव संसाधन व्यवस्थापन विभागले खुला तथा समावेशी प्रतियोगितात्मक परीक्षामार्फत कर्मचारी पदपूर्ति गर्ने गरी आवेदन खुलाएको हो । यसअन्तर्गत अधिकृतस्तरका ३५ र सहायकस्तरका २६ पदमा पदपूर्ति गरिनेछ।
बैंकले सार्वजनिक गरेको विज्ञापनअनुसार सहायक निर्देशक (प्रशासन) पदमा २६ जना माग गरिएको छ। त्यस्तै, सहायक निर्देशक (लेखा तथा लेखापरीक्षण) तर्फ ३, सहायक निर्देशक (वाणिज्य कानुन) तर्फ २ र सहायक निर्देशक (सूचना प्रविधि) तर्फ ४ जनाका लागि दरखास्त आह्वान गरिएको छ।
यसैगरी, सहायक द्वितीय श्रेणीअन्तर्गत प्रशासन सेवामा २६ जना कर्मचारी माग गरिएको छ। यसरी खुला तथा समावेशी प्रतियोगिताबाट कुल ६१ जनाले केन्द्रीय बैंकमा काम गर्ने अवसर पाउनेछन्।
मंसिर १७ गतेसम्म आवेदन दिन सकिने
राष्ट्र बैंकले योग्य नेपाली नागरिकबाट कात्तिक २७ गतेदेखि अनलाइन माध्यममार्फत आवेदन लिन सुरु गरेको छ। इच्छुक उम्मेदवारले नियमित दस्तुरमा मंसिर १७ गतेसम्म आवेदन दिन सक्नेछन्। उक्त अवधिमा आवेदन दिन छुटेका उम्मेदवारले दोब्बर दस्तुर तिरेर मंसिर २४ गतेसम्म दरखास्त पेस गर्न सक्ने व्यवस्था गरिएको छ।
आवेदन दिन चाहने उम्मेदवारले राष्ट्र बैंकको आधिकारिक वेबसाइटको करियर खण्डमा उपलब्ध अनलाइन आवेदन प्रणालीमार्फत फाराम भर्नुपर्नेछ। आवेदनका क्रममा नेपाली नागरिकताको प्रमाणपत्र, तोकिएको शैक्षिक योग्यताका प्रमाणपत्र, ट्रान्सक्रिप्ट, चारित्रिक प्रमाणपत्र तथा आवश्यक अन्य कागजात पेस गर्नुपर्नेछ।
सहायक पदका लागि पूर्वयोग्यता परीक्षा अनिवार्य
राष्ट्र बैंकको विज्ञापनअनुसार सहायक द्वितीय पदमा आवेदन दिन चाहने उम्मेदवारले लोक सेवा आयोगको एकीकृत परीक्षा प्रणालीअन्तर्गत सञ्चालित पूर्वयोग्यता परीक्षा उत्तीर्ण गरेको हुनुपर्नेछ। उक्त परीक्षामा उत्तीर्ण भएको प्रमाणपत्र आवेदनसँगै पेस गर्नुपर्ने व्यवस्था गरिएको छ।
त्यस्तै, सहायक निर्देशकका विभिन्न पदका लागि विषयअनुसार फरक–फरक शैक्षिक योग्यता तोकिएको छ। प्रशासन, लेखा तथा लेखापरीक्षण, वाणिज्य कानुन र सूचना प्रविधितर्फका उम्मेदवारले सम्बन्धित पदको विज्ञापनमा उल्लेखित शैक्षिक योग्यता तथा अन्य सर्त पूरा गरेको हुनुपर्नेछ।
राष्ट्र बैंकले महिला, आदिवासी जनजाति, मधेसी, दलित, अपाङ्गता भएका व्यक्ति तथा अन्य समावेशी समूहका उम्मेदवारका लागि समेत विज्ञापनमा तोकिएअनुसार अवसर छुट्याएको छ। पदगत योग्यता, उमेरको हद, परीक्षा प्रणाली, आवेदन शुल्क तथा छनोट प्रक्रियासम्बन्धी विस्तृत विवरण बैंकको आधिकारिक विज्ञापनमा उल्लेख गरिएको छ।
इच्छुक उम्मेदवारले नेपाल राष्ट्र बैंकको वेबसाइट www.nrb.org.np को करियर खण्ड वा अनलाइन आवेदन पोर्टल jobs.nrb.org.np मार्फत थप विवरण प्राप्त गरी आवेदन दिन सक्नेछन्।
