चार वटा राष्ट्रिय स्तरका विकास बैंकलाई गाभेको नेपाल क्रेडिट एन्ड कमर्स (एनसीसी) बैंकको एकीकृत कारोबार पुस १७ गते आइतबारदेखि सुरु हुने भएको छ । एनसीसीले इन्फ्रास्ट्रक्चर डेभलपमेन्ट बैंक, सुप्रिम डेभलपमेन्ट बैंक, इन्टरनेशनल डेभलपमेन्ट बैंक र एपेक्स डेभलपमेन्टलाई गाभेर एकीकृत कारोबार सुरु गर्न लागेको हो । एनसिसिले एकीकृत कारोबार सुरु गर्न नेपाल राष्ट्र बैंक र कम्पनी रजिष्ट्रारको कार्यालयबाट अनुमति पाएको हो । एकीकृत कारोबार सुचारु गर्न आवश्यक व्यवस्था मिलाउनका लागि शुक्रवार र शनिवार पाँच वटै बैंकले प्रदान गर्दै आएका सबै बैंकिङ कारोवार बन्द हुने बताइएको छ ।
पाँच वटा संस्था गाभिएर बनेको एकीकृत संस्थाको चुक्तापुँजी चार अर्ब ६७ करोड ९० लाख रुपैयाँ पुग्नेछ । बैंकका शाखा संख्या ९६ र कर्मचारी संख्या एक हजार २८ जना पुग्नेछ । त्यस्तै, मर्जपछि बैंकको निक्षेप ५२ अर्व रुपैयाँ पुग्नेछ भने कर्जा ४४ अर्व रुपैयाँ पुग्नेछ ।
