बैंकिङ खबर/ नेकपा एमालेले देशको अर्थतन्त्रलाई विश्वको उदयीमान अर्थतन्त्र बनाइने प्रतिवद्धता जनाएको छ । मंसिर ४ गतेको प्रतिनिधि र प्रदेश सभा निर्वाचनका लागि घोषणापत्र सार्वजनिक गर्दै एमालेले त्यसका लागि प्रारम्भमा सात प्रतिशतको आर्थिक वृद्धिदर हासिल गर्ने जनाएको छ ।
एमालेको घोषणापत्रमा भनिएको छ, ‘प्रारम्भमा सात प्रतिशतको आर्थिक वद्धिदर हासिल गर्दै आगामी पाँच वर्षभित्र आर्थिक वृद्धिदर उच्च बनाउँद यसलाई दुई अङ्कमा पुर्याइनेछ । नेपाली अर्थतन्त्रलाई विश्वको उदयीमान अर्थतन्त्र बनाइने छ ।’
हालको करिव रू ४८ खर्बको कुल गार्हस्थ उत्पादन (जिडिपी) लाई आगामी पाँच वर्षभित्र १०० खर्ब रुपैयाँ पुऱ्याइने छ । पाँच वर्षभित्र नेपालीको औसत प्रतिव्यक्ति आम्दानी अमेरिकी डलर २ हजार ४ सय पुऱ्याइने एमालेको प्रतिवद्धता छ ।
