साताको आइतबारदेखि नै बढ्दो क्रममा रहेको सेयर बजार मंगलबार पनि बढेको छ । नेप्से परिसूचक २१.५४ अंकले बढेर १७८८.०८ अंकमा पुगेको छ । परिसूचक बढेपनि मंगलबार कारोबार रकम भने सोमबारको तुलनामा घटेको छ । सोमबार डेढ अर्बको कारोबार भएको बजारमा मंगलबार १ अर्ब ४५ करोड रुपैयाँ बराबरको पुँजी परिचालन भएको छ । चार घण्टाको अवधिमा १ सय ४२ वटा कम्पनीको १८ लाख ९७ हजार ८२ कित्ता सेयर ६ हजार ७ सय ९६ पटक खरिदविक्रि हुँदा कुल १ अर्ब ४५ करोड १२ लाख ४४ हजार ८ सय ४५ रुपैयाँको कारोबार भएको छ ।
मंगलबार कारोबार भएका सबै समूह बढेका छन् । बैंकिङ समूह २४.३ अंकले बढेको छ भने विकास बैंक १८.५ अंक र फाइनान्स ३.७८ अंकले बढेको छ । केही दिनदेखि ओरालो लागिरहेको जलविद्युत् समूह मंगलबार सबैभन्दा धेरै ९०.७१ अंकले बढेको छ । होटल समूह पनि केही दिनदेखि लगातार घटिरहेकोमा मंगलबार ११.९७ अंकले बढेको छ । बीमा, उत्पादनमूलक र अन्य क्रमशः १५.२६, ७२.१४ र ३.७६ अंकले बढेका छन् ।
बैंकिङ क्षेत्रको कारोबार रकम पनि बढेको छ । वाणिज्य बैंक समूहको पौने ७६ करोड रुपैयाँ बराबरको कारोबार हुँदा विकास बैंक समूहको पौने १७ करोड रुपैयाँ बराबरको पुँजी परिचालन भएको छ भने फाइनान्सको २ करोड रुपैयाँभन्दा बढीको सेयर कारोबार भएको छ । सबैभन्दा धेरै बढेको जलविद्युत् समूहको १० करोडमाथिको पुँजी परिचालन भएको छ ।
कम्पनीगत आधारमा हेर्दा धेरै कमाउने कम्पनीहरुलाई लिड गर्दै चिलिमे हाइड्रोपावरले पौने ९ करोडभन्दा माथिको पुँजी परिचालन गरेको छ । एनबी बैंक र सिटिजन्स बैंकको पनि ८ करोडभन्दा बढीको सेयर कारोबार भएको छ । हिमालयन जेनेरल इन्स्योरेन्सको ७ करोड र लुम्बिनी जेनेरल इन्स्योरेन्सको ६ करोडमाथिको पुँजी परिचालन हुँदा एनएमबी बैंकको पौने ६ करोडभन्दा माथिको कारोबार भएको छ भने सिद्धार्थ बैंक, माछापूछ्रे बैंक, शिखर इन्स्योरेन्स, प्राइम कमर्सियल बैंक लगायतको ४ करोडभन्दा बढीको सेयर कारोबार भएको छ ।
युनियन फाइनान्स, वोमी माइक्रोफाइनान्स, समिट माइक्रोफाइनान्स र राष्ट्रिय बीमा कम्पनीका लगानीकर्ताले १० प्रतिशतका दरले सम्पत्ति बढाए भने शाइन रेसुंगा डेभलपमेन्ट बैंक, सिन्धु विकास बैंक र बोटलर्स नेपालको सेयरमूल्य क्रमशः ९.९६, ९.८१ र ९.५० प्रतिशतले बढेको छ । लक्ष्मी लघुवित्त र नयाँ नेपाल लघुवित्तका लगानीकर्ता ८ प्रतिशतभन्दा बढीका दरले कमाउँदा पाृखरा फाइनान्सका लगानीकर्ताले ७.२४ प्रतिशतका दरले कमाएका छन् । यीबाहेक २ कम्पनीको सेयरमूल्य ६ प्रतिशत, २ वकम्पनीको ५ प्रतिशत र ८ वटा कम्पनीको सेयर मूल्य ४ प्रतिशतभन्दा धेरैले बढेको छ ।
जम्मा ३७ कम्पनीले अधिकतम ३.९२ प्रतिशतदेखि न्युनतम ०.०९७ प्रतिशतसम्म गुमाएका छन् । सबैभन्दा धेरै कमाउनेमा शिखर इन्स्योरेन्सका लगानीकर्ता छन् भने सबैभन्दा थोरै गुमाउनेमा नेपाल इन्भेष्टमेन्ट बैंकका लगानीकर्ता छन् । कुल ६ वटा कम्पनीका लगानीकर्ताले ३ प्रतिशत, २ वटा कम्पनीका लगानीकर्ताले २ प्रतिशत र १३ वटा कम्पनीका लगानीकर्ताले १ प्रतिशतभन्दा बढीका दरले गुमाएका छन् । १ प्रतिशतभन्दा कमका दरले गुमाउनेमा १६ वटा कम्पनी छन् । हिमालयन जेनेरल इन्स्योरेन्स, हामा मर्चेन्ट, युनाइटेड इन्स्योरेन्स, लुम्बिनी जेनेरल इन्स्योरेन्स, प्रुडेन्सियल इन्स्योरेन्स लगायतका लगानीकर्ता गुमाउनेमा परेका छन् ।
