आशा लघुवित्तको व्यवस्थापकीय क्षमता अभिबृद्धी तालिम सम्पन्न

बैंकिङ खबर । आशा लघुवित्तले कर्मचारीहरुको क्षमता अभिवृद्धि गर्ने उद्देश्यले २ दिने व्यवस्थापकीय क्षमता अभिबृद्धी तालिम सम्पन्न गरेको छ । यही २०७७ फाल्गुन ९ र १० गते सौराहा चितवनमा आयोजित तालिम कार्यक्रममा देश भर संचालित ५५ वटा शाखा कार्यालयहरुमा कार्यरत ५५जना शाखा प्रबन्धकहरुको सहभागीता रहेको थियो ।
संस्थाका प्रमुख कार्यकारी अधिकृत बद्री प्रसाद दुलालले उद्घाटन गर्नुभएको कार्यक्रममा उहाले तालिम कार्यक्रमको उद्देश्यबारे प्रकाश पार्दै यस प्रकारका कार्यक्रमहरुले कर्मचारीहरुको कार्यक्षमता अभिवृद्धि हुनुका साथै मनोबल उच्च रहने विश्वास व्यक्त गर्नुभयो । कार्यक्रममा व्यवस्थापकीय क्षमता अभिबृद्धी सम्बन्धी तालिम खगेन्द्र तिम्सिना तथा धितो सम्बन्धी नापनक्सा प्रशिक्षण सुमन कोइरालाले दिनुभएको थियो । साथै उक्त कार्यक्रममा आशा लघुवित्त वित्तीय संस्थाका विभागीय प्रमुखहरु बिजेन्द्र चौधरी, रबिन खतिवडा, दिपेन्द्र खनाल तथा राम कृष्ण न्यौपानेले संस्थाको आन्तरिक नियन्त्रण प्रणाली तथा आन्तरिक व्यवस्थापन सम्बन्धमा तालीम प्रदानगर्नु भएको थियो ।
नेपाल राष्ट्र बैंकबाट ‘घ‘ वर्गको वित्तीय संस्थाका रुपमा स्वीकृति प्राप्त आशा लघुवित्तले ‘‘बिपन्नका निम्ति आशा‘‘ भन्ने मुलनाराका साथ ककनी – ६ नुवाकोटमा केन्द्रीय कार्यालय स्थापना गरी २०७३ भाद्र १५ गतेबाट कारोबार शुरु गरेको हो । हालसम्म वित्तीय संस्थाले २९ वटा जिल्लाहरुका ५५ शाखा कार्यालयहरु मार्फत करीब ६१ हजार सदस्यहरुलाई वित्तीय सेवा उपलब्ध गराउदै आएको छ । संस्थाको हालसम्म करीब रु. ३ अर्ब ३५ करोड कर्जा लगानीमा रहेको तथा सदस्यहरुबाट १ अर्व १० करोड भन्दा बढी निक्षेप संकलन गरेको छ ।

 


सोसिअल मेडिया