बैंकिङ खबर । वोमी लघुवित्त वित्तीय संस्था र नागरिक लघुवित्त वित्तीय संस्थालाई एक आपसमा गाभिन नेपाल राष्ट्र बैंकले अन्तिम स्वीकृति प्रदान गरेको छ । अधिकांश प्रक्रियाहरु सकिएको जानकारी पाए पछि यी दुई संस्थाहरुलाई गाभिन राष्ट्र बैंकले अन्तिम स्वीकृति प्रदान गरेको हो । अब छिटै यी संस्थाले एकीकृत कारोबार सुरु गर्नेछन् ।
२०६८ साल देखि सञ्चालनमा आएको वोमी माइक्रोफाइनान्स राष्ट्रिय स्तरको लघुवित्त वित्तीय संस्था हो । धादिङको नौविसेबाट केहि महिना अघि मात्रै प्रधान कार्यालय चितवनको भरतपुरमा स्थानान्तरण गरेको यस संस्थाले ३२ जिल्लामा आफ्नो शाखा सञ्जाल विस्तार गरिसकेको छ ।
नागरिक भने नयाँ लघुवित्त हो । यस संस्थाले हालसम्म सर्वसाधारणका लागि सेयर जारी गरिसकेको छैन । काभ्रेपलाञ्चोकको वनेपा केन्द्रीय कार्यालय रहेको नागरिकले आफ्नो शाखा सञ्जालहरु विस्तार गर्ने क्रममा रहेको थियो ।
२०७५ फागुन अन्तिम साता वोमी र नागरिकले मर्जरमा जान सहमति गरेका थिए । मर्जर पछि संस्थाको नाम वोमी लघुवित्त वित्तीय संस्था रहने भएको छ भने संस्थाको प्रधान कार्यालय काभ्रेको बनेपामा राखिने भएको छ । सहमति अनुसार संस्थाको अध्यक्षमा विन्दीया प्रधान र सीईओमा वोमीका वर्तमान सीईओ प्रमेश आचार्य नै हुनेछन् ।