बैंकिङ खबर । शिवश्री हाइड्रोपावरले १४ लाख ७६ हजार ४ सय कित्ता साधारण सेयर आयोजना प्रभावितका लागि आजबाट विक्री खुल्ला गरेको छ । शिवश्रीले सिन्धुपाल्चोक जिल्लामा २२ मेगावाटको ‘माथिल्लो चाकु ए’ जलविद्युत आयोजना निर्माण गरिरहेको छ ।
इच्छुक लगानीकर्ताले ५० देखि अधिकतम सात हजार तीन सय ८० कित्ता सेयर खरिदका लागि आवेदन दिन सक्ने छन् ।
कम्पनीले सिन्धुपाल्चोक जिल्लाको भोटेकोशी गाउँपालिका, बाह्रविसे नगरपालिका, त्रिभुपार गाउँपालिका र सुनकोशी गाउँपालिकाका स्थानीयका लागि मात्र सेयर निष्काशन गरेको हो ।
तीन अर्ब ६६ करोड ४७ लाख ८४ हजार रुपैयाँ कुल लागतमा निर्माण गरिएको आयोजनामा ७५ प्रतिशत संस्थापक लगानीकर्ताको सेयर रहने छ । हाइड्रोपावरले १० प्रतिशत आयोजना प्रभावित र १५ प्रतिशत सर्वसाधारणका लागि जारी गर्ने छ । अहिले सम्म आयोजनाको ९६ प्रतिशत काम सकिएको छ । सेयर निष्काशन तथा विक्री प्रवन्धकको काम सिदार्थ क्यापिटलले गरेको छ ।
